Aleqa Hammond: Danmarkip Camp Century akisussaaffigaa

Amerikamiut sakkutooqarfigisimasaanni Camp Centurymi avatangiisinik mingutsitsisoqarsimasinnaaneranut aarlerinartoqarnera misissuinermi nutaami takussuserneqareersoq, Siumumit folketingimi ilaasortaq Aleqa Hammond taama oqarpoq,

Nunatta, Danmarkip USA-llu akornanni siunissami atassuteqarnissaannut oqallinnissaannullu Camp Century pingaaruteqartorujussuusoq, Aleqa Hammond allakkatigut KNR-imut akissuteqarluni allappoq.

- Mingutsitsisoq akiliissaaq. Oqariartuut nunarsuarmi sumiiffinni tamani - aammalu Nunatsinni nalinginnaasumik atorneqartartoq ersarissorujussuuvoq.

- Danmarkip Nunarput avatangiisinullu ilisimatuut suleqatigineratigut Camp Centuryp piviusumik misissorneqarnissaa isumagisariaqarpaa, ajornartorsiutaasullu qanoq annertutigineri erseqqissartariaqarlugit. Tamanna suliamut pisariaqarpoq, Nunatsinnut aamma pisariaqarluni, Aleqa Hammond allappoq.

Aleqa Hammondip aamma oqaatigaa, Folketingimi illersornissamut ataatsimiititaliamut suliaq qaqinniarlugu.

Danskit naalakkersuisuisa avatangiisinut inuussutissalerinermullu ministerip Esben Lunde Larsenip aammalu Nunanut allanut tunngasunut ministerip Kristian Jensenip sakkutooqarfiusimasumi sikup ataa assigiinngitsutigut misissuiffineqassasoq siusinnerusukkut aamma oqaatiginikuuaat.

Aamma atuaruk Naalakkersuisoq minsterilu Camp Centry pillugu paasiniaaniartut