Olsvigip allaffissorneq eqaannerulersikkusukkaa
- Ullumikkut suleriaaseqarpugut allaannginnami inuk aggulullugu sullinniarsarigipput. Illuatungaani immaqa ilinniartitaanermut, tunngasut peqqinnissaqarfimmut tunngasut isumaginninnermullu tunngasut ataqatigiissarluarnagit, naalakkersuisoqarfiillu taakku ataqatigiissarneqartariaqartut, Sara Olsvig oqarpoq.
AAMMA ATUARUK Suleqatigiissitsisut
Sara Olsvigip qitiusumik allaffissuup nutaamik aaqqissuuteqqinneqarnissaa siunniuppaa:
Nammineq susassaqarfigisaannavinnut eqqarsartaaseqarneq atorunnaarlugu Naalakkersuisoqarfiit suleqatigiinnerulersikkusuppai.
Naalagaaffeeqqat qulit
Partii Naleqqap siulittaasuata Sara Olsvig isumaqatigaa.
Allaffissoriaaseq innuttaasunut millionilikkaanut naleqqusagaq nunatsinni atorneqarmat, Hans Enoksen oqarpoq:
- Naalakkersuisoqarfinni uggornartumik naalagaaffeeqqat, oqarluaannaraanni 10-t, massakkut ingerlappagut, tamarmik immikkut ingerlaniarsarisut.
AAMMA ATUARUK Paasiniaaneq meeqqanut inuusuttuaqqanullu atugarliortunut iluaqutaassaaq
Taamaammat Naalakkersuisoqarfinni allaffissorneq aamma minnerulersikkusuppaa.
- Uffa annertoorujussuarmik suleqatigiissutigisinnaasaraluagut aammalu naalakkersuisoqarfinni suliassat ataatsimoortinneqarnerusinnaagaluartut, Partii Naleqqap siulittaasua Hans Enoksen oqarpoq.
Imminnut attuumassuteqartut
Isumaginninnermut politikki aamma ilinniartitaanermut, ineqarnermut suliffeqarnermullu politikkimut attuumassuteqartoq, Sara Olsvigip erseqqissaatigaa.
Naalakkersuisoqarfiillu taakku suleqatigiinnerulerpata, oqartussat isumaginninnikkut naammassisaqarnerulissasut, Olsvig isumaqarpoq:
- Sullisseriaaseq ataatsimoornerusoq tamakkiinerusorlu pilersikkutsigu soorunami aamma pinaveersaartitsinerit sukkanerusumillu sullissineq anguneqassaaq. Taannalu inuiaqatigiittut atorfissaqartipparput, Inuit Ataqatigiit siulittaasuat Sara Olsvig oqarpoq.