Paasiniaaneq meeqqanut inuusuttuaqqanullu atugarliortunut iluaqutaassaaq
Nalunaarusiami immikkoortut pingasuusut Namminersorlutik oqartussat immikkut tikkuartuuppaat, nalunaarusiaq "Namminersorlutik Oqartussat Kalaallit Nunaanni meeqqat inuusuttuaqqallu atugarliortut qanoq ikiorserneqarsinnaanissaannut suliniut"-mik qulequtaqarpoq.
Immikkut tikkuartorneqartut tassaapput Sullissineq, ilaqutariinnut sullissiviit kiisalu ulloq unnuarlu paaqqinnittarfiit pillugit innersuussutit.
Sullissinermut tunngatillugu Kommunit Namminersorlutik oqartussat peqatigalugit ataatsimoorussaminnik sakkussat sullissinermut assigiissaarutaasinnaasut tikkuartuunneqarput. Kommunillumi tamani sullissigasuarsinnaasunik pilersitsisoqarnissaa matumani isumassarsialatsiaasorineqarpoq.
Aamma ilaqutariinnut sullissivinnut tunngatillugu meeqqat ilaqutaasalu sullinneqarnerini ilaqutariinnut sullissiviit annertunermik akuutinneqartalernissaat tikkuartuunneqarpoq. Namminersorlutillu oqartussat aaqqissuussaanik nuna tamakkerlugu ikkatilliisarneq akiorniarlugu paasititsiniaasoqarnissaa tikkuunneqarportaaq.
Ilaqutariinnut sullissiviit eqqartorneqarnerini taakkunani immikkoortortaqarfiliortoqarnissaa kaammattuutigineqarpoq, ilaatigut meeqqat inuusuttuaqqallu kinguaassiutitigut atornerlunneqareersimasut ataatsimoorfigisinnaasaannik pilersitsisoqarnissaa kaammattuutigineqarluni.
AAMMA ATUARUK Kujataani isumaginninnermi kivitsiniarnermi Narsaq aallarniutaassasoq
Aamma ilaqutariinnut sullissiviit amerlanernik ineqatigiiffiusinnaasunik pilersitsoqarnissaa kaammattuutigineqarportaaq, saniatigullu inuusuttuaqqat taakku ilaqutariit sullissiviisa orniguttarfiinut ajornannginnerusumik isersinnaanissaat kaammattuutigineqarluni.
Matumani sullissisoqassatillugu maleruagassat ulloq unnuarlu paaqqinnittarfinni assigiissarneqarnissaat erseqqissarneqarnissaalu nalunaarusiami kaammattuutigineqarpoq. Matumanilu perorsaasut sakkussaat immikkut ersarissarneqartariaqarsorineqarlutik.
Meeqqat inuusuttuaqqallu ulloq unnuarlu paaqqinnittarfinniissinnaanngitsut immikkut neqeroorusiorneqartalissapput. Tassani meeqqat inuusuttaqqallu aanngajaarniutinik atornerluisuusut sakkortuumillu qisuariartartut pineqarlutik.
Nalunaarusiaq siorna septembarimi saqqummersoq Naalakkersuisut nittartagaanni saqqummiunneqaqqammerpoq.
AAMMA ATUARUK Sermersuumi isumaginninnikkut nakkutilliineq illersorneqarsinnaanngilaq
