Nunatta karsia millionerpassuarnik iluanaaruteqarnerusoq
Aalisakkat akigissaartinneqarnerat, raajaqarnerunera Pituffimmilu kiffartuussinissamik isumaqatigiissutip kinguartinneqarnera ilaatigut pissutigalugit aningaasanut inatsit naatsorsuutigisamit angusaqarfiuneruvoq.
Aningaasartuutit isertitallu inatsisitigut pisussaaffigineqattut 55 millionit koruunit sinnilaarlugit allannguuteqarfiupput. Tassa isertitat 55 millioninik amerlanerupput. Allannguutissatut siunnersuummi Randi Vestergaard Evaldsenip naalakkersuisooqatigiinnit peqatajunnaarsinneqarnini sioqqullugu saqqummiussaani tamanna atuarneqarsinnaavoq.
Aamma atuaruk Naalakkersuisut kiffartuussinissamik isumaqatigiissutinut aningaasaleeqqittut
Aningaasat taakku aalisakkerinermik suliffeqarfinneersuunerupput. Raajat aalisakkallu akigissaartinneqarneri raajartassiissutillu qaffaavigineqarnerat nunatta karsia isertitaqarnerulersippaat.
Pituffimmit iluanaarutisiassat kingulliit
Paasissutissat
Aningaasat amerlanersaat ataasiaannartumik isertitaapput, Pituffimmi kiffartuussinissamik isumaqatigiissut annaaneqarsimammat. Aalisarnermit iluanaaruterpassuit tunisat akigissaarnerunerinik raajartassiissutillu amerlanerunerinik pissuteqarput. Taamaammat isertitat taakku siunissaq eqqarsaatigalugu nalorninartoqarput.
- KNI A/S-imit iluanaarutisiassa 8 millionit.
- Nuna tamakkerlugu akileraarutit (aalisarnermit) 10 millionit
- Suliffeqarfiit pisortanit pigineqartut ingerlatseqatigiiffittut akileraarutaat 36 millionit (KNI, Greenland Holding aamma Royal Greenland)
- Raajanut akitsuut 10 millionit
- Avaleraasartuunut akitsuutit - 10,5 millionit (tassalu ikinnerullutik)
- Ukioq manna katillugit 55 millioninik amerlanerupput.
- Ilassutitut isertitat ukiuni aggersuni 25 millioninut ikileriassapput. Aalisarnerlu ingerlalluaannassappat taama pisoqassaaq.
KNI-mi pisariillisaaneq pissutigalugu ukiumut 8 millionit koruuninik amerlanerusunik tunniussaqartarnissaa nalilerneqarpoq. Aamma Greenland Holding Pituffimmi Greenland Contractors aqqutigalugu iluanaarutisiassani kingulliit pissarsiarisussaavai.
Kiffartuussinissamik isumaqatigiissut annaaneqaraluarpoq, kingornatigulli eqqartuussivitsigut suliassanngortinneqarnera pissutigalugu Greenland Contractorsip kiffartuussinini 2016-imi ingerlatiinnarpaa. Tamannalu 21 millionit koruuninik isertitaqarnerusunissamik kinguneqassasoq Naalakkersuisut naatsorsuutigaat. Isertitalli taakku ukioq mannamit pissarsiarineqartarunnaassapput.
Avaleraasartoorniarnermit isertitat ikinnerusut
Nutaarsiassaq nuannerpallaanngitsoq tassaavoq avaleraasartoorniarnerup ingerlalluarpallaannginnera. Taamaammat Naalakkersuisut ukioq mannamut ukiunullu tullinnguuttunut isertitassatut naatsorsuutigisatik 10,5 millionit koruuninik ikilisippaat.
Angusalli ataatsimut isigalugit pitsaasuupput. Aningasanummi inatsit naatsorsuutigisamit 55 millionit koruuninik aningaasartaqarneruvoq.
