Naalakkersuisut kiffartuussinissamik isumaqatigiissutinut aningaasaleeqqittut
Allannguutissatut siunnersuut naapertorlugu, ilaasunik angallassinikkut kiffartuussinissamik isumaqatigiissutinut nutaanut ilassutitut isumaqatigiissutissanut 18,1 millionit koruunit immikkoortinneqassapput.
- Ilassutitut isumaqatigiissusiornissamik suliaqarneq ingerlanneqarpoq 2017-imullu aningaasanut inatsisissap isumaqatigiissutigineqarneranut ilaatinneqarluni. Ilassutitut isumaqatigiissutit aqqutigalugit Kujataani Qeqertarsuullu tunuani angallannikkut kiffartuussinermi pitsanngorsaanissaq siunertaavoq, allannguutissatut siunnersuummi taama allassimasoqarpoq.
Allannguutissatut siunnersuummik Demokraatineersoq aningaasaqarnermullu naalakkersuisuusimasoq Randi Vestergaard Evaldsen atsiortuuvoq.
Kiffartuussinissamik isumaqatigiissutit 123,3 milliionit koruuninik akeqartussaagaluarput, meeqqanut utoqqalinersiuteqartunullu ilanngaatissat ilanngullugit. Ilassutitut aningaasaliinermi aningaasartuutissat tamakkiisut taamaalillutik 14,7 procentinik amerleriaateqarput.
Naalakkersuisooqatigiit allanngornerisa kingorna allannguutissatut siunnersuut suli atuutsinneqarnersoq pillugu aningaasaqarnermut naalakkersuisunngortoq Aqqaluaq B. Egede oqaaseqartinniaraluatsigu iluatsinngilarput.
