SIK: Nunatta Karsia akileraarutitigut annaasaqassaaq
Nuuk Imeq A/S-ip 2018-imi matuneqarnissaa immiaaqqallu sodavandillu qillertuusanngortinnissaat siunnerfigineqarpoq sulili aalajangertoqarani.
Nuuk Imeq A/S-imili sulisut SIK-imit ilaasortaasut eqqorneqassasut, SIKp siulittaasua isornartorsiuilluni oqarpoq.
- Sulisut ikinnerpaamik 35 soraarsinneqassapput, Kommuneqarfik Sermersooq sinneqartoorutinik annaasaqassaaq. Aamma akileraarutitigut kommuni Nunattalu karsia annaasaqassapput, SIK-mi siulittaasoq Jess G. Berthelsen taama oqarpoq.
Taanna aamma oqarpoq qillertuusanut ikaarsaarniarneq paasiuminaatsillugu.
AAMMA ATUARUK Nuuk Imeq A/S-ip matuneqarnissaa innersuussutigineqartoq
Suliffissat akileraarutitigullu isertitat annaaneqarnissaat SIK-mit ernummatigineqarpoq.
- Ernummatigaara maannakkut sulisut soraarsinneqarnissaat ilisimasat ukiorpassuit ilinniarluni pissarsiat ullormiit ullormut tammarnissaat. Taavalu illuatungaatigut sinerissami ilaasortatsinnut akisunerulersinnaanera, Jess G. Berthelsen oqarpoq.
Grønlandskonsortietimi siulersuisuini siulittaasup, Anders Dam Vestergaardip, Nuummi suliffiit pigiinnarnissaat anguniarlugu Namminersorlutik Oqartussanik isumaqatigiinniarnissamik pilersaaruteqarpoq:
- Neriuutigaarput suliami attuumassuteqartut peqatigalugit Nuuk Imermi immiaaqqanik imeruersaatinillu pitsaasunik maqitsisarnerup ingerlaannarnissaanut aningaasaliisinnaajumalluta Kalaallit Nunaanni puunik aaqqissuussinermut nutaamut ikaarsaariarnissamik aaqqissuteqarsinnaalluta, Anders Dam Vestergaard oqarpoq.
