Nunat Avannarliit Nuummi kulturisioqatigiinnerat ullumi aallartissaaq
Taakku Nunat Avannarliinniit piorsasimassutsit pillugit ullumi pingasunngornermi Katuami festivalertitsilerpata takuneqarsinnaapput.
Festivalimut atatillugu ilaatigut suleqatigiinnik pilersitsisoqartarnissaa pilersaarutaavoq, soorlu aamma eqqumiitsuliortut arlaqartut inuit najuuttut eqqumiitsuliaminnut saqqummiisassallutik.
- Kulturi nalinginnaasoq avaqqutaarlugu pisoqartitsissaagut, najuuttut peqataanermikkut kulturi allatulaaq misiginiassammassuk, festivaleqartitsinermi aaqqissueqataasut ilaat festivalip nittartagaanut oqarpoq.
Katuap paarlersuani kulturikkut pikialaartitsineq ammaanersiorneqassaaq, borgemsterip tullersortaanit Justus Hansenimit NAPAmilu pisortamit Mats Bjerdemit ammaasussaallutik.
Nuummi Nunat Avannarliit piorsarsimassutsikkut Nuuk Nordisk Kulturfestival kulturimik pikialaaritsinerat nutaajuvoq, siullerlu ullumimiit (pingasunngorneq) sapaatiuppat tungaanut ingerlanneqassalluni.
Piorsarsimassutsikkut pikialatsitsinermi eqqumiitsuliortut nunanit avannarlerneersut 100-t qaangerlugit peqataassapput, pisullu 40-ut assigiinngitsut ingerlanneqarnissaat naatsorsuutigineqarpoq.
