Ilisimatooq: Nunaqarfiit ilaat ineriartortinneqarsinnaapput
Nunaqarfiit ilaat ukiuni 20-ni kingullerni inukilliartorsimanngillat. Taakkua inuussutissarsiornermik pitsaasumik toqqammaveqarput ingerlalluarpullu.
Inuussutissarsiornikkut toqqammavik illoqarfiit nunaqarfiilluunniitataannarnissaannut apeqqutit pingasuusut ilagaat.
Center for Aarktisk Teknologiimi DTU-mittumi lektori Kåre Hendriksen, ataatsimeersuarnermi taama nassuiaavoq.
Kåre Hendriksenip avannaani nunaqarfiit ilaat Innaarsuit assersuutigaa. Nunaqarfik taanna inuussutissarsiornikkut toqqammavigissaarpoq, qaleralinniarfiulluarluni, innaallagissamut imermullu attavilersugaalluarluni, tunisassiorfigissaarluni sulerusuttunillu inoqarluni.
Taakku pingasut pissutaallutik nunaqarfik taanna inoqutigiit isertitaat nunatsinni qaffasinnerpaat pingajuattut inissisimapput, Nuummi Kangerlussuarmilu inoqutigiit isertitaasa amerlassusaannut tulliullutik.
- Inoqarfiit minnerit ineriartussappata, taakkunani najugaqartut pisuussutinik ilisimasaqartuusut aalajangiisartullu suleqatigiittariaqarput. Taamaasiornikkut nunaqarfiit amerlanerit ineriartussapput, Kåre Hendriksen oqarpoq.
AAMMA ATUARUK Nunaqarfinni suliffissaaleqisut amerleriartut
Lektorilli erseqqissaatigaa nunaqarfik inuussutissarsiornikkut toqqammaveqanngippat, inuit nutsernissartik isumaliutigisariaqassagaat.
Kåre Hendriksenip Qaanaami inuussutissarsiornikkut periarfissanik ineriartortitsisoqarsinnaanera manna misissuiffigaa. Taanna naapertorlugu Qaanaami tunisassiorfiup sivisuumik atorneqarsimannginnera pissutaalluni, illoqarfik nunatsinni illoqarfiit piitsuunersarilersimavaat.
