Kommuneqarfik Sermersuumi nunaqarfiit inuerukkiartupiloortut
Nunaqarfinni najugaqartut allamut nuuttarput, nunaqarfimmiullu utoqqaannanngoriartuinnavillutik. Kommuneqarfik Sermersuumi kommuni kommunalbestyrelsemut nunaqarfinnut tunngasunik suliaqarnermi aningaasat qanoq pingaarnersiorneqassanerannut ikiorsiissutaasussamik nunaqarfiit pillugit immikkoortumut pilersaarusiorpoq.
Immikkoortumut pilersaarut kommunalbestyrelset marsip arfineq aappaani ataatsimiinnerminni akueraat. Kommuneqarfik Sermersuullu nunaqarfiinik arfineq pingasunik ineriartortitsinissamik ilaatigut imaqarpoq.
Nunaqarfimmiut nutsertut amerlangaatsiartut
Immikkoortumut pilersaarutip kommunimi nunaqarfiit ajornartorsiutaat pingasut uparuarpai. Siullertut, nunaqarfimmiut utoqqaat amerlaneruleriartornerat saniatigullu suliffeqanngitsut ikiliartorlutik, aappaattut, nunaqarfimmi innuttaasut nunaqarfimmiit nuuttartut amerlangaatsiarput.
AAMMA ATUARUK Bygdebestyrelser kæmper med at få indflydelse
Innuttaasut amerlassusaat nunaqarfinni tamani ima appariartorput – Isortumi 1994-imi innuttaasut 52 procentiisa nunaqarfik qimassimavaat. Kulusummiut 24 procentii nuussimapput, Arsummilu innuttaasut 65 procentimik ikilisimallutik.
Illut isatertariaqartut
Ajornartorsiutit pingajuat kingullerlu, imigassartorneq qaffasingaatsiarpoq, tamannalu paarsinerluinikkut isumaginninnikkullu ajornartorsiutinik kingunerluuteqartoq immikkoortumut pilersaarummi allassimavoq.
Immikkoortumut pilersaarutip allaaserineqarnera kommunalbestyrelsep nunaqarfinnik ineriartortitsiniarneranik aningaasat sumut atorneqarsinnaaneranut ikiorsiissutaassaaq, Kommuneqarfik Sermersuullu nunaqarfinnik ineriartortitsinissaanut arlalinnik siunnersuutinik ilaqarluni.
Kommuni illukuiaalluni nunaqarfinnik najoruminarsaaniassammat, illunik sanaartukkanillu kikkut piginnittuuunersut qulaajarneqassasoq, siunnersuutinut ilaavoq.
Kommuneqarfik Sermersuup matumik ataasiinnarmik saaffiginnittarfeqarnissaa tigussaasutut akueraat. Tassalu kommunip nunaqarfinni sulisui Nuummi Tasiilamilu allaffeqarfimmi ataasiinnarmut saaffiginnittarfeqalissasut.
