VIDEO Nittartakkani allassimasunik kalaallisut atuffanneqarsinnaalerputit
Atuffat Martha, taama taaguutilik, tappiitsunut, isigiarsuttunut aamma naqinnernik ilisarinnissinnaanngitsunut qarasaasiaq atorlugu nittartakkatigut oqarasuaatitigullu nittartakkanut attaveqarsinnaasutigut kalaallisut atuffassisartoq, Katuami ippassaq ualikkut saqqummiunneqarpoq.
Atuffat Martha ukiut pingasut atorlugit ineriartortinneqareerluni, suliarinnittunit Synscenter Refsnæsikkunnit ullumi saqqummiunneqarpoq. Atuffat Martha suliffeqarfiup MV-Nordic A/S-ip ineriartortereerlugu, kalaallisut oqaatsinik atuffassisalersippaa, Kalaallit Nunaanni oqaatsinik ilisimasaqartunit suleqateqarnermikkut, tamannalu iluatsilluartutut oqaatigineqarsinnaasoq, suliarinnittunit oqaatigineqarpoq.
Atuffatip Marthap pisinnaasai pillugit siulliulluni ippassaq saqqummiivoq, Danmarkimi Synscenter Refsnæsip pilersaarusiortuisa pisortaat, Lars Ballieu Christensen. Taassuma oqaluttuaralugu, Atuffat Marthap kalaallisut oqaatsinik immiussinermi suliap ineriartorsimanera.
Akeqanngitsumik aaneqarsinnaavoq
Lars Ballieu Christensenip ilaatigut oqaluttuaraa, angerlarsimaffinni qarasaasiat atorlugit Atuffat Martha aaneqarsinnaasoq ajornanngitsuaqqamik, taamatullu tappiitsut, isigiarsuttut naqinnernillu ilisarinnissinnaanngitsut ulluinnarni atugaannik oqilisaaqataassinnaalluartoq oqaluttuaralugu.
Atuffat Martha atorlugu qarasaasiatigut allassimasut suulluunniit atuartinneqarsinnaapput. Tamannalu Nunatsinni tappiitsut isigiarsuttullu peqatigiiffianni siulittaasup, Hans Peter Larsenip, nuannaarutigaa.
Ilaqutigilluassanerarpaat
- Atuffat Martha iluaqutsiullugu tappiitsut, isigiarsuttut aamma naqinnernik ilisarissinnaanngitsut periarfissinneqarput ulluinnarni taakku atugaasa pitsaanerulernissaannik aamma inuiaqatigiinni pisunut malinnaanerulernissaannik, Hans Peter Larsen oqarpoq imalu nangilluni.
- Atuffatip Marthap siunissami iluaqutigisinnaasaasa pingaaruteqarluartut ilagaat tassa tappiitsut, isigiarsuttut aamma naqinnernik ilisarinnissinnaanngitsut ilinniagaqarnerminni tamanna atorlugu iluatsilluartumik naammassisaqarsinnaalermata, tamannalu Nunatsinnut tamanut iluaqutaassasoq naatsorsuutigineqarsinnaalluarpoq, tappiitsut isigiarsuttullu peqatigiiffianni ISI-mi siulittaasoq. Hans Peter Larsen, KNR-imut taama oqarpoq.
Atuffatip Marthap pilersinneqarneranut Veluxip aningaasaateqarfia aningaasaliisuuvoq.
Atuffat Martha nittartakkakkut akeqanngitsumik aneqarsinnaavoq ugguuna: www.atuffat.gl
