Nissebandenikkunnut aliannaarit
Juullimut mappersagaq Puk, Lunte, Gemyse minnerunngitsumillu Inuk inuttaasut TV-kkut siullermeerluni 1989-imi isiginnaarneqarsinnaalerpoq maannamullu pingasoriarluni aallakaateqqinneqarnikuulluni.
- Misigisaq tupinnaqaaq, taamani sanagatsigu meeqqakka ilagaakka maannakkullu ernuttakka ilagalugit isiginnaarsinnaavara, ammartakkamik oqaluttualiortuinnaanani aamma inuttaasuni pingaarnertut isiginnaartitsisoq, Flemming Jensen KNR-imut oqarpoq.
Nissebanden i Grønlandip siullermik takutinneqarneranit ukiut 27-it qaangiutereeraluartut Flemming Jensen TV-kkut juullimut ammartakkami inuttatut suli ilisarineqartarpoq.
- Ilaanni qinngarnarsinnaasarpoq, isiginnaartitsisarfimmi ilumoorsaartumik isiginnaartitsigaangama oqartarpoq, tassa taanna ammartakkami punniliisartoq. Kisianni inuit qanoq isummernissaannut aalajangiisoqarsinnaanngilaq, Flemming Jensen oqarpoq.
Juullimut ammartakkap oqallissaarutaanissaa isumaanngisaannarsimavoq, Flemming Jensenilli jullikkunni nunap piinik atuinersuaq, nunani killerni ajornartorsiutaalersimasusutut isigisani, ammartakkakkut eqqumaffiginerulersinniarsimavaa.
- Inuiaqatigiit assigiinngitsut marluk saqqummiuppakka. Holme Olstrupip tigumatuujuneq uungaannaq isiginninneq, Kalaallit Nunaannullu eqqarsaaterpassuit takusassallu saqqummiuppai, Flemming Jensen oqarpoq.
Taanna nunatsinni najugaqarnikuuvoq, danskillu maannga qanoq ilisimasaqanngitsiginerat arlaleriarluni annilaarutigisarpaa.
Danskilli kalaallinut inuiaqatigiinnut ilisimanninnerannik Nissebanden i Grønlandimit pitsaanerulersinneqanngitsoq Flemmingip nassuerutigaa.
- Qanorli danskit Kalaallit Nunaannik ilisimasaat juullimut ammartakkaminngaanneersuuneruppat. Aali uanga Kalaallit Nunaat asimi sanaartukkanik katersugaasivittut allaaserigiga - katersugaasik nuannersoq. Piniartuunerulli nalaaneersumik oqaaluasaatoqanik aallaavilimmik ammartagaliorneq Kalaallit Nunaannik ikiuiniarneruvoq ajoqutaaginnartussaq, Flemming Jensen.
