Nipilersortartut angalanermut tapiissutinik qinnuteqarsinnaalersut
Nipilersortartummi nunatsinni angalanissaannut tapiissutissatut 1 millionit koruunit aningaasanut inatsimmi nutaami immikkoortinneqarput.
Nunatsinni Nipilersortartut Kattuffiat naapertorlugu tapiissuteqartarnissamik kissaateqarneq kattuffimmit aasaq saqqummiunneqarpoq, taamaaliornikkut avinngarusimasumiittut illoqarfimminnut nunaqarfimminnulluunniit nipilersortartunik tikisitsisinnaalerniassammata.
- Nuannaarutigilluinnarparput kissaaterput oqariartuuterpullu tusaaneqarsimammat, Nunatsinni Nipilersortartut Kattuffiat tusagassiorfinnut nalunaarummi taama allappoq.
Nipilersortartut kattuffiannit aamma oqaatigineqarpoq timersortartunik suleqateqartoqarsinnaasoq, timersoqatigiiffiit angalanissaminnut aningaasanik katersuiniarnerminnut atatillugu nipilersortartut angalanerinut aningaasartuutit matussusernissaannut tapiissutinik aamma qinnuteqarsinnaassammata.