Nipilersornermik festivalit silarsuarmi anginersaannut qaaqqusaasut
Nipilersoqatigiit Small Time Giantsip aamma nunat avannarliit siunnersuisoqatigiivisa nipilersortartumut nersornaasiuttagaanut ukioq manna innersuunneqartut Uyarakq & Peand-eL-ip qaaqqusaarnerannut nunani avannarlerni piorsarsimassutsikkut attaveqaat, NAPA, aqqutissiuisuuvoq.
- Nipilersoqatigiit nunanit avannarlerneersut Austinimi festivalimi SXSW-mi saqqumilaarnerulernissaminnut periarfissaqalernerat nuanneqaaq, NAPA-mi pisortaq Mats Bjerde taama oqarpoq.
Taamatut siuliniuteqarneq aamma Nunani avannarlerni ministerit siunnersuisoqatigiivinit tapersersorneqarpoq.
- NAPA-p SXSW-qarnerani nunat avannarliit nipilersornikkut nittarsaanneqarnissaannut suliniuteqarnerani, minnerunngitsumillu kalaallit nipilersortartut nittarsaavimmut taama pingaaruteqartigisumut peqataatinnissaannut ikiorsinnaagatsigu nuannaarutigaara, taamaaliornikkummi nunani avannarlerni kulturikkut suliaqarnerup qanoq siammasitsiginera takutinneqarsinnaammaat, Tobias Grut, nunani avannarlerni ministerit siunnersuisoqatigiivineersoq taama oqarpoq.
Nipilersornermik festivalimi silarsuarmi anginerpaajusumi nipilersoqatigiinnik nunatsinneersunik marlunnik siullerpaamik peqataasoqarpoq. ’Nivi Nielsen and the Deer Children' siornatigut aamma tassani nipilersorsimapput.
Nunat avannarliit nipilersortartunik marsip qaammataani nittarsaaneranni ilaatigut Norge, Danmark, Island aamma Savalimmiut aamma peqataatitaqassapput.
