Nipilersoqatigiit Sume pillugit piviusulersaarut nersornaasigassatut innersuunneqartoq
Nunap inoqqaavisa filmiliaat Torontomi ImagineNative Film + Media Arts Festivalimi takutinneqartarput, 15-issaalu filmfestivalertoqarluni. "Sume - mumisitsinerup nipaa" pisimasunik filmiliani suliarineqarluarsimanerpaatut innersuunneqarpoq, soorlu aamma ilitsoqqussaralugu oqaatsit atorlugit filmiliani suliarilluagaanerpaatut aamma innersuunneqarsimasoq.
Filmimi ilitsersuisoq Inuk Silis Høegh filmimi ilitsersuisut akornanni pikoorinnerpaatut aamma innersuunneqarpoq.
Sume pillugu filmiliaq Torontomi pingasunngornermi oktobarip 26-ani takutinneqassaaq, tuluttullu aamma atserneqarsimalluni, tassa "Sume - The Sound of a Revolution"-imik taaguuserneqarsimagami.
Ilitsersuisoq Inuk Silis Høegh filmiliornermilu ingerlatsisoq Emile Hertling Peronard filmip Torontomi takutinneqarnerani peqataassapput:
- Filmiliatta Kalaallit Nunaanni tigulluarneqarnera eqqarsaatigalugu nunani allani takutinnissaa pissanngatigaarput. Kalaallit Nunaat pillugu Kalaallit Nunaannut filmiliornissarput siunertariuarsimavarput, Sumeli pillugu oqaluttuaq silarsuarmut tamarmut atorpoq, tassami inuiannut aamma tunngassuteqarpoq, nunanilu allani tamanna aamma soqutiginassaaq, pingaartumik nunap inoqqaavisa oqaluttuarisaanerannut aamma soqutiginaateqassalluni, Emile Hertling Peronard oqarpoq.