Nipilersoqatigiit "Malik" Islandimi tusarnaartitsisussatut toqqarneqartut
Dommerisut ataatsimiititat ataasinngornermi aggustip 15-iani Band Swapimi Islandimi Reykjavikimi peqataasussanik toqqaapput. Peqataasussatut toqqarneqartut septembarip 24-ani tusarnaartitsisarfimmi Gaugurinnimi tusarnaartitsissapput.
Nipilersoqatigiit assigiinngitsut tallimat Nuummeersut peqataarusullutik nalunaarsimapput.
- Assut tulluusimaarpugut, tupaqaagullu paasigatsigu uagut bandswappimut qinigaasimasugut. Islandermiut rockertissavagut pikkusutserujussuarlugit. Tupaqqangaaratta nalulerparput qanoq oqassanerluta nuannaaqaagut assut. Qujanarujorujussuaq takutitsilluaruloorumaarpugut, Malik Kleist Katuamut taama oqarpoq.
Band Swap Nunatta Islandillu akornanni nipilersortartunik paarlaasseqatigiinneruvoq.
Katuaq ilisimatitsivoq Islandimiut nipilersoqatigiit kikkut Katuami tusarnaartitsiartussanersut oktobarimi nalunaarutigineqassasoq Katuamilu tusarnaartitsillutik.
Band Swap aaqqissuunneqarpoq Katuaq, General Konsulat Nuuk aammalu Air Iceland suleqatigiinnerisigut, taanna aaqqissuussaq siorna 2015-mi aallartippoq, isumaqatigiissitaallunilu ukiuni pingasuni ingerlasussatut.
