Nauja Lyngep nunarput naalagaaffeqatigiinnerlu allaaserisalissagai

Kalaallit Nunaat Naalagaaffeqatigiinnerlu pillugit aviisimi Jyllandspostenimi aqagumit allaatiginnittartoqalissaaq.

Nauja Lynge naalagaaffeqatigiinnerup nutarsarneqarnissaanut ikinnerussuteqartullu peqataatinneqarnissaannut illersuisartuusoq aqagumit allaatiginnittalissaaq. Tamannalu inuttaata qilanaarinerarpaa.

Kalaallit Nunaat aamma Naalagaaffeqatigiinneq pingaarnertut sammisassavai aammali danskisut innuttaassuseqarnermut atatillugu qulequttat allat sammisassallugit. Nunatsinnilu qinersineq pillugu paasissutissiissamaarluni.

Nauja Lyngelu TV2-newsimi “News & Co”-imi piffissami qanittumi aamma isummersueqataasassaaq.

- Nutaamik, Kalaallit Nunaannit aallaaveqartariaqanngitsumik, sammivilimmik allaaserinnittalernissara qilanaaraara, Nauja Lynge oqarpoq, taannalu misigisimavoq, Kalaallit Nunaat pillugu oqaluuserinninneq, igutsaap inaanik kaanninninnermut assigusinnaasartoq.