Napparsimakulasarnerit pissutigalugit Steffenip anaanami nangia taarsertariaqartaraa

Kommuneqarfik Sermersuumi utoqqarnik sullissinermi sulisut napparsimakulasarnerat, KNR-imi ataasinngormat unnukkut sammineqartoq, qanigisaasup Steffen Petrussenip malugisinnaanerarpaa.

Arnaa Nuummi utoqqaat illuanni najugaqarpoq. Steffenili ilaqutaalu iluamik paarineqarnersoq paasiniarlugu pulaakulasariaqarpaat.

- Paarlakaalluta alakkartarparput nangia taarserneqarsimanersoq iluamillu isumagineqarnersoq qulakkeerniarlugu, Steffen oqarpoq. 

Steffen Petrussen oqaluttuarpoq anaanaminut ilaqutaaginnarsinnaannginnertik ilaqutariinnut kipiluttunartuusoq. Sulisummi suliassaat aamma isumagisariaqartarpaat.

Aamma atuaruk Utoqqarnik sullissisut napparsimakulasarnerat kommunimut akisusoq

- Pissutsimmi imaattariaqaraluarput anaanama angerlarsimaffigigaa uagullu angajoqqaatsinnut pulaaginnarsinnaalluta. Pissutsilli imaapput utoqqaat illuanniikkaluartoq uagut isumagiartortariaqarlutigu, KNR-imut taama oqarpoq.

Kommunimi utoqqarnik sullissinermi sulisut akornanni napparsimasarnerit Qanoruumi ippassaq ataasinngornermi sammineqarmata sulisup ataatsip agguaqatigiissillugu ukiumut ulluni 21-ni napparsimasarnera oqaatigineqarpoq. Pingaartumillu akissarsiffiup nalaani napparsimasut amerlasaqaat.

Annertuumik ajornartorsiutaanera kommunimit miserratigineqanngilaq. Kommuneqarfik Sermersuumi Isumaginninnermut, Suliffeqarnermut Inuussutissarsiornermullu ingerlatsivimmi pisortaq Grethe Nielsen taama oqarpoq. Ajornartorsiutip ammasumik oqaluuserineqarnissaa pingaartuusoq taassuma oqaatigaa.

- Tassalu napparsimakulasoqarpallaaqaaq, Grethe Nielsen taama oqarpoq.