Utoqqarnik sullissisut napparsimakulasarnerat kommunimut akisusoq
Kommunip upernaaq manna misissuisitsisimanerata tamanna takutippaa.
Utoqqarnut sullissisut akornanni ulluinnarni sulisut qulit napparsimasarnerat nalinginnaasarpoq, aningaasarsiffinnilu nalinginnaalluni sulisut 25-t napparsimasarnerat.
Kommuneqarfik Sermersuumi utoqqarnik sullissisut akornanni illoqarfinni tamani agguaqatigiissillugu ukiumut ullut 21-t napparsimasoqartarpoq, Danmarkimullu sanilliutissagaanni Danmarkimi utoqqarnik sullissisut ullut qulingiluat qulilluunniit napparsimasartut.
Sulisut napparsimasarnerat oqaloqatiginninnikkut ataatsimeeqateqarnikkullu sapinngisamik ikinnerpaaffimminiitsinneqarnisssaat pingaaruteqartoq, Kommuneqarfik Sermersuumi Isumaginninnermut, Suliffeqarnermut Inuussutissarsiornermullu Aqutsisoqarfimmi pisortap Grethe Nielsenip oqaatigaa:
- Ajornartorsiutaasorlu ammalluta oqaloqatigiissutigisinnaasariaqarparput. Tassa napparsimasoqakulasarnera ajornartorsiutaasoq oqaloqatigiissutigisariaqarlutigu, Grethe Nielsen oqarpoq.
Sulisut napparsimakulasarnerat aningaasartuutaasarnerisa saniatigut utoqqarnik sullissinerup ajornerulerneranik aamma kinguneqarsinnaavoq, soorlu Steffen Petrussenip arnaata ajornartorsiulerneranik:
- Ingammik sapaatip-akunnerisa naanerini, anaanannguakkuluga sapaatip-akunnersua tamaat nangini atunnginniassammagu tulleriiaarluta isertarpugut, Steffen Petrussen taama oqarpoq.