Nalunaarutiginnittarnerit amerlinerat nuannaarutigineqartoq
Pinerluffigineqarsimasullu nalunaarutigininnissamut piareersimanerulersimasut, inuit atoqatigiittarnerannut tunngasunik immikkut ilisimasalik tapersiilluni oqarpoq.
- Amerlanerulernerat ajoraluartumik qujassutigisariaqarparput, kinguaassiuutitigut kannguttaatsuliorfigineqarsimasut,k kanngusuttarput taamaattumillu amerlasuut nalunaarutigineqarneq ajorput, taamaattumillu kannguttaatsuliortut unnerluutigineqarlutik nalunaarutigineqartartut amerlinerat qujassutigissavarput. Sexolog Ulrikka Holm taama oqarpoq.
Kinguaassiuutitigut pinerluttuliorfigineqartut 2015-mit 2016-mut 29 procentinik amerleriarsimasut, Kalaallit Nunaanni politiit ukiumoortumik 2016-mi nalunaarusiaanni takuneqarsinnaavoq.
Nunatsinni kinguaassiuutitigut eqqunngitsuliorfigineqartut nalunaarutiginninissaminnut
tunuarsimaartartut, Ulrikke Holmip sinerissap sinnerani angalalluni oqaloqatiginnittarnermini misilittagarilersimavaa.
- Taamaattumik pingaaruteqarpoq ingerlaannaq napparsimaveqarfimmukarnissaq misississortillunilu, Ulrikka Holm oqarpoq.
Atuarfinni isumaginninnermut siunnersortinik atorfinitsitsisoqarsimanera ingammillu meqqat illersuisuata Kalaallit Nunaanni tamarmi angalalluni meeqqat pisinnaatitaaffii pillugit paasisitsiniaasimanera kinguaassiuutitigut pinerluffigineqartut nalunaaruteqartut amerlisimanerannut pissutaasut eqqartuussissuserisoq Ulrik Blidorf oqarpoq.
Aammalumi inuit pinerluffigineqarnermik nipangiussiinnarunnariartortut, Ulrikka Holmip maluginiarpaa:
- Sinerissami angalagaangama soqutigineqartarpoq paaserusunneqarlunilu qanoq iliorluni peqqinnarnerusumik kinguaassiuutitigut atoqatigiittoqarsinnaanersoq aamma kinguaassiuutitigut atornerlugaasarnerit ammanerusumik oqaluuserineqartartut malunnarpoq, Ulrikka Holm oqarpoq.
Nunani allani kinguaassiuutitigut pinerluffigineqartut pinerluttuliortullu tarnip pissusaanik ilisimasalinnik ikiorneqartartut, immikkut ilisimasallip eqqaavaa. Nunatsinnilu taama aamma neqerooruteqarnissaq pisariaqartoq unnerpaa.
- Nunatsinni katsorsaaveqalernissaa aamma kissaatiginarpoq, inuit atoqatigiittarnerannut tunngasunik immikkut ilisimasalik sexolog Ulrikka Holm Qanoruumi pingasunngornermi taama oqarpoq.
