Inatsisissaq Naalakkersuisut isumaqatigiinngissutigigaat

Innuttaasut ingerlatsineq pillugu paasisaqarsinnaatitaanerannut danskit inatsisaat Kalaallit Nunaanni suli danskit ingerlataannut atuutissanersut ukiarmili saqqummiunneqarmat Inuit Ataqatigiit siunnersuummut akerliusimapput.

Taamaaliornissarli Danmarkimi inatsisinik atuutsitsinermut ministereqarfiup kissaatigigaluarpaa.

Inuit Ataqatigiit maanna Danmark kajumissaarpaat siunnersuut uterteqqillugu.

Sara Olsvig KNR-imut taama allappoq.

Innersuussutigaa Folketingimi amerlanerussuteqartut, naalakkersuisut ilaallutik,  danskit Innuttaasut ingerlatsineq pillugu paasisaqarsinnaatitaanerannik inatsit maanna allanngortinnialeraat.

AAMMA ATUARUK Nunani avannarlerni paasisaqarsinnaatitaanermut inatsit matoqqanerpaaq

Taama pisoqassappat Naalakkersuisut inatsimmik piffissaq sivikitsoq qaangiuppat nutaanngilereersussamik akuerseqataassagaluarput.

Naak Inuit Ataqatigiit akerliugaluartut Naalakkersuisut nalunaarutaanni immikkut isorinnittunik oqaaseqartoqanngilaq, siunnersuut sapaatip akunnerata tulliani Inatsisartuni oqallisigineqassaaq.

AAMMA ATUARUK Danskit inatsisaata eqqunniarneqarnera GE-p isornartorsioraa

Sara Olsvig ilanngullugu allappoq Inuit Ataqatigiit Naalakkersuisut siulittaasuannut Naalakkersuisullu sinnerinut isummiussartik pillugu erseqqissummik nalunaarutigisimagaat. Demokraatittaaq ukiarmi siunnersuummut qularput, danskilli kissaatigisaat ataqqigamikku akuerseqataallutik.

Siunnersuulli Nunatsinni tamanut tusarniaassutigineqarsimanngimmat ukiami siullermeerneqareerluni peerneqarpoq, maannalu maajip aappaanni oqallisigineqassaaq.

AAMMA ATUARUK Paasitinneqarsinnaatitaaneq pillugu inatsit danskit partiivisa allanngortikkusukkaat