Mobili: Tele-Post annilaangasaarivoq
Piginneqatigiifimmi pisortaq Palle Christiansen naapertorlugu telemi attaveqaatit namminersortunngortinneqarpata, tamanna Tele Post-imut aningaasatigut allaat iluanaarutaajumaarpoq nunattalu atortulersugaanerata annertusarneqarneranut iluaqutaajumaarluni.
- Niuffanneq annerulissaaaq, tamanna eqqaamasariaqarparput. Niuffatigisaq arlaliulluta agguataagassarput taannaannaajunnaassaaq Palle Christiansen oqarpoq.
Taassuma erseqqissaatigaa, nammineq 2009-mit 2011-mut aningaasaqarnermut naalakkersuisuunermi nalaanani silaannakkut angallanermi unammillersinnaaneq ammaakkamiuk.
Aamma atuaruk Combyimi pisortap attaveqaatinik unammillertoqartikkusuppaa
Aalajangiusimaavaalu, taamaaliornissaq Air Greenlandip kaaviaartitaminut akornutaanissaa taamanikkut ernummatigisimammagu. Taamali ernumassuteqarneq Mobilimi pisortaq naapertorlugu tunngavissaqarsimanngilaq.
- Killormoortuanik Air Greenland aningaasatigut aatsaat taama angusarissaattigaaq, aasaq manna aatsaat taama timmisartumik takornariaqartigaaq.
Oqaatigisassaq tassaavoq, unammillerneq iluaqutaavoq, akit appartarmata. Air Greenlandip taamani naammagittaalliutai taakkorpiaat, Tele Postip maanna naammagittaalliutigai.
Aamma atuaruk Telep namminersortunngorsarneqarnissaanut Kalaallit Nunaat piareersimanngilaq
Taamaattumik Palle Christiansen isumaqarpoq, Tele Post imminerminnit unammillerneqarnissaaminik ernumassutissaqanngitsoq.
Taassuma qularutiginagu oqaatigaa, akit appasinnerulerpata atuisut mobiiliminnik atuinerulissammata. Tamatumalu kingunerissagaa, Tele Post iluanaaruteqarnerussasoq mobiilikkut attaveqarnermik tuniniaaviup nutaap nammineq attaveqaateqannginnami Tele Postip mobiilinut attaveqaatai atortussaagamigit.
Akit apparpata mobiilinik atuisoqarnerulissaaq
Akillumi apparpata mobiilinik atuisoqarnerulissasoq, telekkut attaveqaqatigiinnermik nalilersuisartup, suliffeqarfimmillu Netplanimik aallartitsisup, Torben Lundip uppernarsarpaa.
- Danmarkimi telemut attaveqaatitigut sullissineq ukiut kingulliit 20-it ingerlannerani ammanerulersinneqarnerata kingorna akit appariartuinnavissimapput. Mobiilikkut attaveqarnermi akit appariartuinnavipput sulilu appariartuinnavissallutik inuillu atuineruleriartuinnarlutik, Torben Lund oqarpoq.
Torben Lundip aamma qularnaapaa, telekkut attaveqaatit siunissami ineriartortinneqarnissaanut akissaqartoqarumaartoq, akit appasinneruleraluartut mobiilinik atuisartut atuinerulissammata.
Unammilleqatigiittoqarnissaanut nuna mikivallaarpoq
Unammilleqatigiinneq pillugu immikkut ilisimasalik, Niels Rytter, ullumi oqaaseqarusunngilaq, siusinnerussukkulli oqarpoq Kalaallit Nunaanni atuisartut ikeqimmata ammanerulersitsineq kissaatigineqartutut angusarfiunavianngitsoq.
- Kalaallit Nunaani innuttaasut 56.000-it missaanniipput taakkualu simammarsimaqalutik. Illoqarfik naammattunik pisisussalituaq tassaavoq Nuuk. Illoqarfiit nunaqarfiillu sinneri isumaga naapertorlugu niuerfissatut tunngavissaqaratik, Niels Rytter oqarpoq.
Aamma atuaruk Telemi ammanerulersitsinissaq nalorninartorsiortitsivoq
Immap naqqatigut kaabilip Nuummiit Aasiannut tallinissaanut Tele Postimit kinguartinneqarnera telemut attaveqaatit ammanerulersinneqarnissaannut politikerinut annilaangasaarinninnerusutut, Palle Christiansenip isigaa.
- Tele Greenland kisermaassilluni ingerlatsivittut telemi attaveqatiinik tuniniaalernissarput kissaatiginngilaa. Tuniniaaleruttami ajortorpassuarnik kinguneqarsinnaanerinik oqaluttuarniarlutik ulapipput, Palle Christiarnsen oqarpoq.
