Combyimi pisortap attaveqaatinik unammillertoqartikkusuppaa
Brian Torpip isumassarsiaa telemi ilisimasallip ilaatigut tapersersorpaa kisiannili nalunaarasuartaateqarnermik ammanerulersitsiniarnerup piviusunnguvinnissaa qularnartoqartippaa.
Nunap timaani qaqqat qaavini maanna napparussuaqartiterpoq. Tassaallutik radiumi sakkortusaaviit, illoqarfinnut nunaqarfinnullu internettimik oqarasuaatinillu attaveqaataatinik ingerlaartitsisut.
Radiumi atassuteqaatit ajutooraangata aaqqinnissaat akisoorujunngorsinnaavoq, tassami teknikerinut mittarfinnik unnuisarfinnillu pilersitsinissaq pisariaqassammat.
Aamma atuaruk Attaveqaatinik ammanerulersitsinissamut suleriaaseq isornartorsiorneqarpoq
Periarfissatsialattut isigineqartoq
Qaqqanut ajutoortoqartillugu aggertarnermiit radiumik atassuteqaqatigiiaanik unammillikkamik pilersitsinissaq Combyimi pisortap Brian Torpip periarfissatsialaasinnaasutut isigaa.
- Sakkortusaavinnut aserfallatsaaliuiartorluni ornigunnissaq ajornannginnerulissaaq, akikinnerullunilu, angallaffiusut eqqaanni sakkortusaaviliortoqarpat, taamaalilluni qulimiguulimmik timmisariaqarnani umiatsiamik qamuteralannilluunniit orninneqarsinnaalissammata.
Marlunnik radiukkut atassuteqaqatigiiaanik peqaleraluarpat aappaalu ajutoorluni, taava aappaata unammillertini ammaatissagaluarpaa, taama Brian Torp tikkuaavoq. Taamaasiornerlu tuaviortumik aggertitsinermut sipaarutaassagaluarpoq.
Aamma atuaruk Internetti akikinnerulissappat avinngarusimasormiut minitaasinnaapput
Brian Torpip radiunik atassuteqaqatigiiaanik unammillikkamik peqalernissaa ajoqusiiunnanngitsoq oqaatigaa.
- Taamannak iliorneq assigiinnarpaa motorvejimik sanagaanni sanianilu aamma sanaqqikkaanni, taava aqqusineq siulleq aqquserngup aappaata ajoqusernavianngilaa.
Ammanerulersitsiniarneq isumaqarpallaanngitsoq
Nunatsinni nalunaarasuartaateqarnermik ammanerulersitsiniarnermik eqqarsaat telemi misissuisartup Torben Runep qularnartoqartippaa radiukkulli atassuteqaqatigiiliornissaq teknologi tungaasigut silappaarissuunerarpaa.
Akerlianilli Torben Runep nalunaarasuartaateqarnermik ammanerulersitsinissaq isumassaqartinngilaa.
Oqallinneq aamma Europami oqallisigineqarpoq, misilittakkallu aallaavigalugit ammanerulersitsineq isumaqarpallaanngilaq. Sumiiffinni inoqarluartuni akikinnerulissagaluartoq inukinnerni allaanerujuussasoq Torben Rune isumaqarpoq.
