Telemi ammanerulersitsinissaq nalorninartorsiortitsivoq
Telep Naalakkersuisut nassuiaateqarnissaat utaqqivaat, nutaanik attaveqaatinut aningaasaliinnginnerminni, kiffartuussissutinik niuffatsitsinerup qanorpiaq ingerlanneqarnissaata paaseqqaarusukkamikku.
Telep pisortartaava ima nalunaaruteqarpoq:
Tamanna Tele Post-imut isummerfiginiagassaalluni unammilligassaqartitsilerpoq. Taamaattumik aalajangertoqarpoq, kabelip immap naqqatigoortup ivertinneqarnissaa kinguartinniarlugu.
Taama oqarpoq sapaatip akunnera ataaseq qaangilaarlugu qaangiummat pisortanngoqqammisoq Kristian Reinert Davidsen.
Aamma atuaruk IA Ilulissani: Tele-Postip nunarput marluinngorlugu avippaa
Ammanerulersitsinissamut tunngaviliiniassammat Namminersorlutik Oqartussat Nunatsinni telemi tuniniaavik pillugu misissoqqissaakkamik noqqaasimavoq.
Taanna naammassineqartinnagu Tele Post aningaasarpassuit atorlugit kabelimut immap naqqatigoortumut aningaasaleerusunngilaq.
Qanoq aningaasalersorneqassanersoq nalornissutaavoq
Ammanerulersitsinermi, unammillernermiluunniit aningaasat sinneqartooruteqarfiusuniit amingartooruteqarfiusunut nuunneqarsinnaanngillat.
Tele Postimi ullumikkut mobilitigut sinneqartoorutit internetip akiinik apparsaasuupput, aammalu telemi attaveqaatit pitsanngorsarnerinut, illoqarfiit nunaqarfiillu amerlanerusut internetimut attaveqalerniassammata.
Tele-Postip interneti amigartooruteqarluni ingerlappaa, taamaattumik kabelip immap naqqatigoortup imminut akilernissaa ungasippoq.
Aamma atuaruk Immap naqqatigut kabel Nuummiit Aasiannut ilaneqarnissaa kinguartinneqarpoq
Kabelip aningaasalersorneqarnissaanut pitsanngorsaanernullu allatut aningaasalersueriaaseq nassaarisariaqarpoq.
Amigartoorfiit aningaasassaqartinnissaat siunissami pisariaqarpoq. Ammanerulersitsineqassappat nalunanngilaq aalajangertariaqartoq aningaasat sumit pineqassanersut.
Kristian Reinert Davidsenili isumaqarpoq ammanerulersitsinerup kabelip tallineqarnissaa unitsinnavianngikkaa.
Tele Postili kisimi aningaasaleerusunngilaq.
- Taava aningaasat allanit pisariaqarput, nutaat takkuteriataarsinnaasut aamma kabelimut aningaasaleeqataassapput, pisortaq naggasiivoq
