Politikki

Ministeri: Kalaallit Nunaannut immap assingi nutaat qaqugu piariissanersut nalunarallarpoq

Danmarkimi Geodatastyrelsip allamut nuunneqalernera immap assinginut nutaanut 73-inut 2018-imi naammassineqartussanut kinguneqartussanngorpoq. Danskit ministeriata Troels Lund Poulsenip (V) Folketingip Nukissiuuteqarnermut, Pilersuinermut Silallu pissusia pillugu ataatsimiititaliaanut akissuteqarluni tamanna uppernarsarpaa.

Chef SOK, Finn Hansen, og og besætningsmedlemmer kigger på søkort på broen ombord TULUGAQ

Kort over havstrømmene ved Grønland, Island og Nordamerika

Allattoq Camilla Dam

apriilip 27-at 2016 11:16

Nutserisoq Simon Uldum -

- Kalaallit Nunaannut immap assingi piffissaq eqqorlugu naammassineqassanngillat. Tamanna aningaasaqarnermik pissuteqarani Geodatastyrelsilli Aalborgimut nuunneqarneranut atatillugu ilisimasatigut annertuumik annaasaqartoqarneranik pissuteqarpoq. Geodatastyrelsimi Kalaallit Nunaannut immap assinginik suliaqartunit 15-iusunit 12-it atorfimminnit soraarsimapput, danskit inuussutissarsiutinut pissaqarneruleriartornissamullu ministeri akissuteqarluni allappoq.

Danskit naalakkersuisuisa naalagaaffiup suliffeqarfiutaanik nunap sinneranut nussuinissamik pilersaarutaanut atatillugu, Geodatastyrelsi Københavnimit Aalborgimut nuunneqartussaavoq. Tamannalu pissutigalugu sulisut arlallit atorfimminnit soraarsimapput.

Aamma atuaruk Kinguaattoortoqarnissaa ilimagineqarpoq

Soraarnerminnilu ilisimasatik imaaliallaannaq taarserneqarsinnaanngitsut nassarpaat.

- Immap assinginik suliaqarneq imaannaanngitsuuvoq piginnaasanillu immikkuullarissunik pisariaqartitsiffiulluni. Aamma sulisut nutaat ilinniartinneqartarnerat sivisuupilussuusarpoq, tamanna issiaqatigiilluni ilinniartitsinikkut pinerusarmat.

- Geodatastyrelsi sulisunik nutaanik ingerlaavartumik atorfinitsitsisarpoq taakkulu aqutsisoqarfiup nunani tamalaani geodatamut tunngatillugu suleqatigisai imarsiornermillu suliaqartut allat ikiorsiullugit ilinniartinneqartarput.

- Geodatastyrelsip naliliinera naapertorlugu, sulilersut nutaat Kalaallit Nunaannut immap assinginik suliaqarnermik tamakkiisumik ingerlatsilernissaannut piffissaq sivisussaaq, Troels Lund Poulsen taama oqarpoq.

Taamaammat immap assingi nutaat qaqugu naammassineqassanersut nalunarallarpoq. Namminersorlutik Oqartussanut isumaqatigiissutip nutarterneqarsinnaanera maanna oqaloqatigiissutigineqartoq, danskit ministeriata aamma oqaatigaa.

Imartani uuttortarneqarsimanngitsumi kigaanerusumik ingerlaartariaqartut

Issittumili Sakkutooqarfik naapertorlugu nunap assingisa kinguaattoorutigineqarnerat annerusumik kinguneqassanngilaq.

- Immap assinginik amigaateqarnerup kingunerisaanik imartani uuttortarneqarsimanngitsuni angalagaangatta kigaannerusumik ingerlaartariaqartassaagut mianersornerullutalu, Thomas Bruun De Neergaard, Issittumi Sakkutooqarfimmi Nuummiittumi tusagassiinermut paasissutissiinermullu officeri KNR-imut siornatigut taama oqarpoq.

Aamma atuaruk Aleqa Hammond: Danskit Naalakkersuisuisa isumannaallisaaneq tunulliuppaat

Apeqquteqaat aallaavigalugu oqallisigineqassaaq

Immap assinginik nutaanik suliaqarnissaq 2009-imi isumaqatigiissutigineqarpoq. Troel Lund Poulsen taamani avatangiisinut ministeriuvoq. 2013-imilu, Venstrep illuatungiuliuttuunerata nalaani, immap assinginik nutaanik tunniussinissamik isumaqatigiissutip killiffia apeqqutigaa, 2014-imilu isumasioqatigiittoqarnerani, taamani avatangiisinut ministeriusup Kirsten Brosbølip (Socialdemokraatit), pilersaarutit malinneqartut erseqqissaatigaa.

Folketingimut ilaasortap Aaja Chemnitz Larsenip (Inuit Ataqatigiit) Christian Juhl (Enhedslisten) aamma savalimmiormiu Magni Arge (Tjóðveldi) peqatigalugit nukissiuuteqarnermut, pilersuinermut silallu pissusianut ministeri sammisaq pillugu apeqquteqaat aallaavigalugu oqallinnissamut aggersarpaat. Pilersaarutillu malillugit immap assingi maajip 17-iani oqaluuserineqassapput.