Kinguaattoortoqarnissaa ilimagineqarpoq
Danskit naalagaaffianni suliffeqarfiit nunat ilaanut allamut nuunneqalernerisa pissutaalluni nunatsinni imartat nutaamik asseqalernissaat kinguaattuussangatinneqarpoq. Naalagaaffiup nunamik uuttortaasarfiata, Geodatastyrelsenip, attaveqaqatigiinnermut immikkoortortaqarfiani aqutsisup Michael Borg Rasmussenip KNR-imut tamanna uppernarsarpaa.
Immap assingi 2018-iutinnagu 73-it piareerneqareersimanissaat isumaqatigiissutigineqaraluarpoq.
Geodatastyrelsenili Aalborgimut nuunneqalermat nunatsinni immap assiliornerata piffissaq eqqorlugu naammassinngitsoorneqalernersoq aarleqqutigineqarpoq.
Uuttortaasartut arlallit, nunatta imartaanik immikkut ilisimasallit, suliffitsik malillugu Aalborgimut nooqataanianngillat.
Nunattalu imartaanik uuttortaanermik kinguaattoorfiussammat, Folketingemi ilaasortap Inuit Ataqatgiinneersup Aaja Chemnitz Larsenip ajuusaarutigaa.
Aamma atuaruk Nunatta imartaata uuttortaqqinneqarnera kinguaattuussangatinneqartoq
Nunatsinni immap assiliornerata piffissaq eqqorlugu naammassinngitsoorneqarpat Issittumi Sakkutooqarfimmut annertunerusumik sunniuteqassanngilaq.
- Taamaanneratalu kinguneranik umiarsuarput immami uuttortarneqanngitsumi kigaannerusumik sillimanerullunilu ingerlaartassaaq, Issittumi Sakkutooqarfiup attaveqaqatigiinnermut immikkoortortaqarfianersup Thomas Bruun De Neergaardip oqaatigaa
Immamili inuussutissarsiortunut annertuumik sunniuteqarsinnaammat Kalaallit Nunaanni sulisitsisut peqatigiiffiat, GE, isumaqatigiissutip piffissaliussap iluani naammassineqarnissaanik kissaateqarpoq.
Aamma atuaruk Nuussinissaq Nunatsinnut neriorsuummik aarlerinaateqarpoq
- Danmarkimi aqutsisoqarfiit nuussorneqarnerisa tamanna kingunerissappagu ajussaqaaq. Kinguaattoorfiussanersorli suli naluarput. Danskit naalagaaffiat tamanna oqaatigissavaat, GE-mi pisortaq, Brian Buus Pedersen oqarpoq, nangillunilu:
- Taamaammat innersuussutigerusuppara naalakkersuisut danskit naalagaaffiannut saaffiginnissasut isumaqatigiissut piffissaliussap iluani naammassineqanngippat nunatsinnut qanoq sunniuteqarsinnaanersoq paasiniarlugu.
Ineqarnermut Sanaartornermullu naalakkersuisoq Knud Kristiansen nunatsinni immap assiliorneq kinguarsarneqassanersoq pillugu paasissutissanik pissarsiniarluni sulissuteqarmat maannakkorpiaq oqaaseqarsinnaanngikkallarpoq.
