Ministereqarfik radareqarfik pillugu ilisimatinneqareersoq
Amerikami oqartussat Pituffimmi radarip teknikkikkut nutarteriffigineqarnissaanik Nunarput Danmarkilu arlaatigut ilisimatereersimavai. Nunanut allanut tunngasunut ministereqarfik taama ilisimatitsivoq.
Ministereqarfik KNR-imut mailikkut ima allappoq:
’Danmark Kalaallit Nunaat peqatigalugu Pituffimmi radareqarfik pillugu nassuiaammik ukiumoortumik pissarsisarput. Naalakkersuisullu Suka Frederiksenip ilisimatitsissutigeriigaatut, radareqarfimmi suliniuteqartoqarnera 2016-imi ilanngullugu ilisimatitsissutigineqarpoq’.
AAMMA ATUARUK Naalakkersuisup Pituffimmi nutarterineq misissuiffiginiaraa
Inatsisartut Folketingilu ilisimatinneqanngitsut
USA-lli ukiumoortumik nassuiaatimini suliniummut tunngatillugu qanorpiaq ilisimatitsissuteqarsimanersoq Nunanut allanut ministeqarfimmit oqaatigineqanngilaq.
Danmarkillu Nunattalu suleqatigiillutik suliniut qanorpiaq imaqarnersoq maanna misissuleruttorpaat, ministereqarfik mailikkut taama allappoq.
Taamaammat Nunanut allanut pisortaqarfiup Nuummiittup Danmarkimilu nunanut allanut ministereqarfiup USA-p radareqarfiup nutarterneqarnissaanik arlaatigut ilisimatinneqarsimanissaat ilimanarpoq. USA-lli qanoq sukumiitigisumik ilisimatitsisimanersoq, aammalu Namminersorlutik Oqartussat danskillu naalagaaffiata USA-p radareqarifmmut tunngatillugu sunik ingerlataqarneranik qanoq qisuariaateqarsimanersut nalunarpoq.
Folketingip Nunat allat pillugit ataatsimiititaani siulittaasup, Dansk Folkepartiimeersup Søren Espersenip, suliaq sapaatit akunnerata siuliani oqaaseqarfigerusunngilaa danskillu naalakkersuisunut innersuussilluni.
AAMMA ATUARUK Suliap ingerlanneqarnera pitsaasuunngilaq
Folketingilli nunat allat pillugit ataatsimiititaanut ilisimatitsisarnerit tunngaviatigut allanut oqaatigeqqusaanngikkaluartut, Enhedslistenip ataatsimiititami ilaasortaatitaata Nikolaj Villumsenip oqaatigaa Pituffimmi radareqarfiup qanittukkut nutarteriffigineqarsimaneranik Ataatsimiititap ilisimatinneqarsimaneranik eqqaamasaqarani.
- Tamanna eqqaamasaqarfiginngilara. Missilinut illersornissaq pillugu Kalaallit Nunaanni aaqqissuussisoqarneranik ilisimatitsisoqarsimappat, ataatsimiititaq tamanna pillugu pinngitsoorani ilisimatinneqarsimasariaqaraluarpoq. Ilisimatinneqarsimanitsinnilli eqqaamasaqanngilanga, Nikolaj Villumsen taama oqarpoq.
AAMMA ATUARUK USA radarimik annertusaanissaminut akuerineqareerpoq
Ministerimut apeqqutit
Paasissutissanillu amigaateqartoqarnera pissutigerpiarlugu, Alternativetip Kalaallit Nunaannut tunngasunut oqaaseqartartua, Roger Matthisen, nunanut allanut tunngasunut ministerimut Anders Samuelsenimut suliaq pillugu apeqqutinik tallimanik saqqummiussivoq.
- Pituffimmi sakkutooqarfimmi sunik suliaqartoqarneranut paasissutissat pigisatta taama killeqartiginerat isumakulunnarpoq. Isumaqarpunga Naalagaaffeqatigiit taama annikitsigisumik akuutinneqasimassappata (radareqarfimmik nutarterinermut tunngatillugu, aaqq.), tamanna USA-p tungaanit tamakkiisumik pissaaneqartutut pingaarniakujuttutullu pissusilersortoqarneranik ersersitsisoq, KNR-imut taama oqarpoq nangilluniluni:
- Suliap annertunerumik misissorneqarsimannginnera, ministeriunerup nunanullu allanut tunngasunut ministereqarfiup tungaanit iliuuseqannginnermik takutitsivoq.
Ilaatigut radareqarfiup nutarteriffigineqarnera sioqqullugu Nunanut allanut tunngasunut ministereqarfik ilisimasaqarsimanersoq, USA-llu, Nunatta Danmarkillu Igalikumi isumaqatigiissutaata 2004-meersup malinneqarsimaneranik Samuelsen naliliinersoq apeqqutigaa.
