Hansen: Suliap ingerlanneqarnera pitsaasuunngilaq
USA-p Pituffimmi radareqarfimmik nutarteriniarnera pillugu Inatsisartut Nunanut allanut Sillimaniarnermullu Ataatsimiititaliaat ilisimatinneqartariaqarsimasariaqarsimanersoq ataatsimiititaliap paasinialeruttorpaa.
- Nutarterineq qaqugukkulluunniit pisinnaasoq ilisimavarput, aamma Igalikumi Isumaqatigiissut aallaavigalugu, kisianni taama annertutigisumik nutarterilersaarneq ataatsimiititaliamut ilisimatitsissutigineqarsimanngilaq, Inuit Ataqatigiit sinnerlugit Inatsisartuni ilaasortaq Ane Hansen, Inatsisartullu Nunanut allanut Sillimaniarnermullu Ataatsimiititaliaanni siulittaasoq taama oqarpoq.
Ataatsimiititaliaq juulip ulluisa pingajuanni ataatsimiippoq, amerikamiut naalakkersuisuisa sakkutooqarnikkut ingerlataasa atortuisalu annertuumik allanngortiterniarneqarnerat Igalikumi Isumaqatigiissut naapertorlugu ingerlasimanersoq matumani paaserusunneqarluni.
AAMMA ATUARUK USA radarimik annertusaanissaminut akuerineqareerpoq
Ataatsimiititaliaq tassunga atatillugu Nunanut Allanut naalakkersuisumut Suka K. Frederiksenimut marlussunnik apeqquteqaateqarpoq, Pituffimmi annertuumik allannguisoqarniarneranut atatillugu Naalagaaffeqatigiit kalaallillu naalakkersuisui ilisimatinneqarsimanersut peqataatinneqarsimanersullu paasiniarneqarluni:
- Kalaallit Igalikumi Isumaqatigiissut naapertorlugu peqataatinneqartussaammata, Ane Hansen oqarpoq.
Hansen: Suliap ingerlanneqarnera pitsaasuunngilaq
Amerikamiullu Pituffimmi annertuumik allannguiniarnerat pillugu tusagassiorfitsigut tusaqqaassallugu Ane Hansenip apeqquserpaa:
- Pitsaasuunngilaq. Tassa unneqqarissumik oqassagaanni perusunnarneruvoq Igalikumi Isumaqatigiissut malillugu ataatsikkut qallunaat kalaallillu naalakkersuinikkut suliaqartuisa tamanna pillugu peqataatinneqarlutillu ilisimatinneqarnissaat, Ane Hansen taama oqarpoq.
AAMMA ATUARUK Nunarput piutillugu USA-mut attaveqarneq ajornannginnerusoq
Pituffimmi radareqarfiup nutarterneqarniarnera amerikamiunit Namminersorlutik Oqartussanut ilisimatitsissutigineqarsimasoq, Suka K. Frederiksenip sapaatip-akunnerata siuliani nalunaarutigaa, Pituffimmi 2015-imi 2016-imilu suliniutit pillugit nalunaarusiat aallaavigalugit naalakkersuisut taama nalunaaruteqarlutik.
Amerikamiut Pituffimmi annertuumik nutarteriniarnerat Naalaakkersuisuni immikkut oqaluuserineqarsimanngitsoq, Suka K. Frederiksenip oqaatigaa.
Ataatsimiititaliap aggustip 15-iani akissutissarsinissani ilimagigaat
Pituffimmi nutarterisoqarnissaanut suliariumannittussarsiuussisoqarmat suliassaq amerikamiut suliffeqarfiisa ilaannut tunniunneqarpoq, 250 millionit koruunit missaanni naleqassangatinneqarluni.
AAMMA ATUARUK USA-p qimataanik saliinissaq Danmarkip akilerniaraa
Pituffimmi radareqarfiup nutarterneqarnissaata 2020-mi naammassineqarsimanissaa naatsorsuutigineqarpoq.
Inatsisartut Nunanut allanut Sillimaniarnermullu Ataatsimiititaliaata naatsorsuutigaa naalakkersuisunut apeqquteqaatit aggustip 15-iutinnagu akineqarumaartut, ataatsimiititaliarlu tamanna pillugu kingorna aamma isummersorumaarluni.
