Camp Century pillugu oqaluttuarineqartartut danskit naalagaaffiata toqqorterniartarsimagai
Nunanut allanut tunngasunut ministereqarfimmi toqqortaatigineqartut ilisimatuut misissoreerlugit paasisaat taamaapput.
Sorsunnerup nillertup nalaani amerikamiut Kalaallit Nunaanni sakkutooqarnikkut suliaat danskit oqartussaasuisa tamanut saqqummiunneqarnissaat killilersorniarsimavaat.
USA-mi State Departementip danskillu nunanut allanut tunngasunut ministereqarfiata isumaqatigiissutaanni 1952-imeersumi tamanna atuarneqarsinnaavoq.
AAMMA ATUARUK Atomip eqqagassartaanik sermersuarmut inissiinissaq Danmarkip akuerisimavaa
Aarhus Universitetimi Center for Videnskabsstudiami lektori Kristian Hvidtfelt Nielsen taama oqaluttuarpoq.
- Isumaqatigiissummi pineqarpoq tusagassiortut amerikamiut Kalaallit Nunaannukassangaangasa isernissaannut piumasaqaataasarsimavoq pinngitsooratik tusagassiatik Københavnimut nassiuttassagaat. Tusagassiat danskit oqartussaasuisa tamanut saqqummiunneqannginnerini oqaaseqarfigisinnaallugit.
Lektorip suleqanni Henry Nielsen peqatigalugu Camp Century pillugu danskit tusagassianik pinnissimanerat allaaserisimavaat.
USA'p amerikami innuttaasut paasitikkusussimavai Camp Century tassaammat naalakkersuisut Sovjetimut illersuutaat.
Danskilli naalakkersuisuisa sakkutooqarfik pingaaruteqarpallaanngittuunerarniarsaringaat.
- Pingaartumik sermip iluani raketit atominik qaartartulisartut sulluliarsuartigooruttalerniarlugit sakkuttuut pilersaarutaat tamanut tusarliunnaveersaarunneqarsimapput.
AAMMA ATUARUK Atomi pillugu akuersisoqarnikuuneranik politikkerit ilisimatinneqarsimasut
Taamaattumik nunat allamiut allaaserisaat danskit oqartussaasuinut akuerisassatut nassiunneqaqqaartarsimapput.
- Assersuutissaateqarpugut allaaserisaasa danskit oqartussaasuinit atuarneqaqqaartarsimanerinik, Camp Centurymilu sakkutuut pilersaarutaat sammineqarpallaaraangasa qisuariarfigineqartarsimapput.
Amerikamiut tusagassiortut arlallit danskit nakkutilliinerat naammagittaalliutigisimavaat. Danmarkilu akisilluni nalunaartarsimavoq danskit tusagassiortui amerikamiut Kalaallit Nunaanni sakkutooqarfiinut killeqanngitsumik isersinnaalerpata nakkutiginninnertik unitsikkumaarlugu.
AAMMA ATUARUK Liberal Alliance afviser redegørelse af Camp Century
Taamaattoqanngisaannarporli.
- Taama iliornermi takutinniarneqarpoq amerikamiut Kalaallit Nunaanniinnerannut danskit killiliisinnaanerat, Aarhus Universitetimeersoq Kristian Hvidtfelt Nielsen oqarpoq.
USA'p Kalaallit Nunaanniinnera pillugu danskit saqqummersitat pillugit misissueqqartarnerat nassuiaatitaqanngitsumik 1963-imi atorunnaarsinneqarpoq.
