Mala Høy Kúko: Saliinernut annertuunut akisussaaffimmik tigusinissaq aarlerinartoqarpallaaqaaq
Pinngortitamut Avatangiisinut Inatsisinullu Atuutsitsinermut Naalakkersuisoq, Mala Høy Kúko, tusagassiorfinnut nalunaaruteqarluni taama allappoq.
Qisuariarneq tamanna pivoq KNR-imi sapaatip akunnerani kingullermi oqaluttuarineqarmat, eqqakkat ulorianaatilittut taaneqartut 3500 tonsit Danmarkimut nassiunneqarsinnaanngitsut, Uummannatoqqamilu matoorunneqartut, Namminersorlutik Oqartussat aamma Danmarkimi avatangiisinut ministereqarfik isumaqatigiissuteqarmata issumik EU-mut eqqussinissamut inerteqquteqarneq tunngavigineqarmat.
AAMMA ATUARUK Pituffiup eqqaani eqqakkat ulorianartut nunamut matoorunneqarput
- Saliinerit annertuut tamatigut nalorniffiusunik arlalinnik nalaataqarfiusarput, taamaattumillu akisussaaffimmik tigusiffigissallugit aarlerinarpallaartarlutik, Mala Høy Kúko isumaqarpoq.
- Mingutsitsisup saliinermut akisussaatinneqarneratigut, aamma Namminersorlutik Oqartussat saliinermut atatillugu saniatigut akiligassinneqannginnissaat qulakkeerneqassaaq, Mala Høy Kúko oqarpoq.
Nunamut Namminermut Avatangiisinut Pinngortitamullu Naalakkersuisuusimasup Anthon Frederiksenip Naalakkersuisunut ilaasortaanerata nalaani Dundasimi saliinissamut Danmarkip Kalaallit Nunaatalu isumaqatigiissutaat atsiorpaa.
AAMMA ATUARUK Uummannatoqqami avatangiisinik saliinerup killiffia Antuup paaserusukkaa
Avatangiisinut Naalakkersuisoqarfimmi siunnersortip inassuteqarneratigut aalajangerneqarpoq issoq mingutsinneqarsimasoq nunap qeriuaannartup qummut killingata ataanut inissinneqassasoq, EU-mi malittarisassat malillugit Danmarkimut nassiunneqarsinnaanngimmat.
Aaqqiineq tamanna, Naalakkersuisup tusagassiuutinut nalunaarutaa naapertorlugu, silap pissusiata allannguutigisinnaasai eqqarsaatigineqarmat avatangiisinullu illersorneqarsinnaammat, aaqqiissutaasumilu politikkikkut isumaqatigiissummi 2011-meersumi anguniakkat, taamanikkut Nunamut Namminermut, Pinngortitamut Avatangiisinullu Naalakkersuisuusup Anthon Frederiksenip isumaqatigiissuteqarfiginiarlugit aalajangigai tunngavigineqarmata, Pinngortitamut Avatangiisinut Inatsisinullu Atuutsitsinermut Naalakkersuisoq Mala Høy Kúko tusagassiuutinut nalunaaruteqarluni taama allappoq.
