Tele-Postip internetti sukkanerusoq Kitaani atulersikkaa
Kujataani Nanortalimmit avannaani Uummannamut illoqarfiit attaveqaatinut digitaliusunut attavilerneqarput attaveqaatillu ullumikkumit atulersinneqassapput.
Immap naqqatigut kabelip tallilerneqarneratigut, sakkortusaavitigullu attaveqaatit ilaannik pitsanngorsaasoqarneratigut, illoqarfiit 13-it nunaqarfillu Kangerlussuaq internettimik nioqqutissanik nutaanik maanna periarfissaqarfiulerput.
- Internettimut flatratemik nioqqutit sivisuupilussuarmik piumasaqarsimasut peqatigisaanillu internetti sukkanerusoq pineqarput, Tele-Postimi attaveqaqatigiinnermut pisortaq, Arnakkuluk Jo Kleist, taama oqarpoq.
AAMMA ATUARUK Internettimut attaveqarnerup pitsaanerulersinnissaa issittumi nunat sulissutigisariarpaat
Atuisut attaveqaatit sukkassusiat datallu nassiussorlugilluunniit tigooqqarneqartut naapertorlugit ullumi akiliisarput.
Nioqqutigineqalersuni nutaani datap annertussusia killeqartinneqassanngilaq, aamma flatratemik taaneqartartoq, taamaalillunilu internettip sukkassuia naapertorlugu akiliisoqartalissaaq.
Internetillu sukkanerulissaaq, illoqarfinnili assigiinngitsuni internettimut sukkassutsit periarfissaasut aallaqqaammut assigiinngissuteqalaassapput.
AAMMA ATUARUK Sakkortusaaveqarfiusuni pitsaanerusumik akikinnerusumillu internetteqalissaaq
- Nuummi Qaqortumilu sukkassutsit maannamut atugaasut illoqarfinni pineqartuni tamani atorneqarsinnaalerput, sumiiffiillu ilaanni 30Mbit angullugu periarfissarilissavaat, attaveqaqatigiinnermut pisortaq taama oqarpoq.
Inoqarfinni 14-iusunit qulingiluani internettip sukkassusia 30 Mbit angullugu ullumikkumit periarfissaalissaaq.
- Sumiiffinnili tamani tamanna perirfissaassanngilaq, netværkerput sukkassutsit taakku sumiiffinni tamani atornissaannut maannakkorpiaq piareersimanngimmat, Arnakkuluk Jo Kleist taama oqarpoq.
AAMMA ATUARUK Immap naqqatigut attaveqaat inuussutissarsiutilinnut iluaqutaassaaq
Taamaammat Kangerlussuarmi, Nanortalimmi, Narsami, Paamiuni Uummannamilu internettip sukkassusia siornatigut 4 Mbitiusoq maanna annerpaamik 10 Mbitiulissaaq.
Tele-Post naapertorlugu, inoqarfinni pineqartuni tallimani internettip 30 Mbit missaani sukkassuseqalernissaa pilersaarutaavoq, digitalimilli attaveqaatinik suliaqarneq aappaagu ingerlateqqinneqartussami suli suliassaqarpoq.
Nioqqutinik nutaanik atulersitsineq Tele-Postip immini iluaqutigissasorinngilaa. Ingerlatseqatigiiffiummi naatsorsuutigaa sullitami nioqqutinut ataatsimoortunut nutaanut nuunnerat kaaviiaartitamigut 10 millionit koruuninik annaasaqarfiusussaq.
AAMMA ATUARUK Immap naqqatigut kabeli tallineqartussanngorpoq
Innuttaasut 92 procentiisa internettimut sukkasuumut attavilerneqarnissaat ukiut sisamat ingerlanerini 800 millionit koruuninik akeqassaaq.
Tele-Postimiillu siornatigut oqaatigineqarpoq aningaasaliissutissat ingerlatseqatigiiffiup nammineq aningaasaataanit, taarsigassarsinikkut ingerlatseqatigiiffiullu aningaasarsiorfiginerpaasaanit oqarasuaatinik angallakkanik atuisunit pissarsiarineqassasut.
