ASSIT Eqqumiitsuliat nunarput ukkatarineqaqqilersissinnaagaat

Eqqumiitsuliornerup Kalaallit Nunaat pillugu nunani allani allatut eqqartorneqartittaraat Rosing-Asvid Arosimilu immikkut ilisimasalik isumaqarput.

Naja Rosing-Asvidip eqqumiitsuliortutut sullivia igalaarsuaqarpoq Aarhusimi aqqusinernut angallaffiunerpaanut  isikkivilinnik, piumasullu maajip qaammataa tamaat sulinerani isiginnaariarsinnaasimavaatl.

Sullivik Aros Public Eqqumiitsulianik katersugaasiviup siorna ammarpaa. Naja Rosing-Asvidimut suleriaaseq taama ittoq nutaarluinnaavoq.

- Inuit isigitillugit siornatigut suliaqanngisaannarsimavunga. Taamatulli sulinissara siumut ilisimareerpara.

Naja Rosing-Asvid pinngortitami nassaassat atorlugit eqqumiitsuliortartutut ilisimaneqarpoq. Maannalu sulinermini pinngortitamut eqqakkat atornissaat sammisimallugu.

Siunertamut tassunga plastikkinik Nuummi aqqusinernut ingitanik nassarsimavoq, allallu Aarhusimi nassaani atorsimallugit.

- Ilai erroriarlugit manitsivimmut manigakkit,  saneqqullugit quianakujupput. Taamaattumik inuit alapernaallutik sulerinersunga takuniarlugu isertarput.

Suliannut plastikkit ilaapput, eqqumiitsuliama ilaanni imaani igitakut ataaniit isigineqartutut suliaraakka.

Taamaalilluta isiginnaariallu oqaloqatigiissutissaqalersarpugut.

- Oqartarput oqallisigisaq ilungersunartuusoq, "-ilumummi ajorluinnarpoq," "qujanaqaaq taakku sammigakkit" ilutigitillugulu oqartarlutik "suliat pinningaarami".

Kalaallinut tunngasut ukkatarigakkit tassarpiaavoq kalaallit eqqumiitsulioriaasaannik ilisimasakinneq sammerusukkakku.

Katersugaasivimmi ilisimaneqanngilaq inuit qassit takuniaasimanersut. Naja Rosing-Asvidili eqqoriaavoq ullormut inuit quliniit 30-it tikillugit takuniaasartut.

Tamanna nuanneqaaq, eqqumiitsuliornermi Kalaallit Nunaat pillugu oqaluttuanik nutaanik pilersitsisarpoq.

- Isumaqarpunga eqqumiitsuliorneq amerlasuunik uisitsisartoq, Danmarkimimi Nunarput pillugu eqqartortakkat nuanninngittut katatikkusuppagut.  Kalaallit Nunaat pillugu nutaanik oqaluttualiorusuppugut. Eqqumiitsuliat nipilersuutillu oqaluttuat nuannerluinnartuupput amerlaqisunit nuannaarutaasinnaasut, Rosing-Asvid oqarpoq.