ASSIT Kunngissap nuliatalu assingi saqqummersinneqartut
Assiliisartoq, Marco Grobs, nunat siuttuinik, politikerinik, nipilersortartunik filmiliaritittartunillu assiliisartutut ilisimaneqartoq, maanna Danmarkimi Frederiksborg Slotimi Det Nationalhistoriske Museumimi saqqummersitsivoq.
Allattoq Mads Pedersen
aggustip 25-at 2016 15:02
Qallunaat nunaanni Det Nationalhistoriske Museumimi saqqummersitsinerminut atatillugu Marco Grobsip kunngissap nulialu assilisimavai.
Tamannalu assiliisartup nuannaarutigaa.
- Nunap siuttuinik amerlasuunik assiliinikuuvunga. Aatsaalli kunngikkormiunik assiliillunga. Kunngissaq nulialu assilillugit nuanneqaaq, inussiarneqaat oqaluukkuminarlutillu, Marco Grobs tusagassiutinut nalunaarummi allappoq.
Taassuma aamma oqaatigaa nammineq sulisartukkormiuni peroriartorsimalluni. Taamaammallu inuit pingaarutillik assiligaangamigit iluatsitsisutut misigisimasarluni.
- Assilisinnaagakkit qujamasuppunga. Assilisamalu takutinnissai qilanaaralugu, Marco Grobs allapoq.
Assiliisartut tusaamasap assilisaasa ilai ataani takukkit:
