Kujallermi innuttaasut meeqqanut akilersuutinut millionilinnik aamma akiitsoqartut
Aningaasat pineqartut kommunimit atorluarneqarsinnaagaluartut, Kommune Kujalliup borgmesteria Kiista P. Isaksen taama isumaqarpoq.
- Meeqqanut akilersuutit kommuninit Namminersorlutik Oqartussanut nuunneqarnissaat taassuma siunnersuutigaa, soorlu aamma Qeqqata Kommuniata borgmesteria Malik Berthelsen taama siunnersuuteqartoq. Kiista P. Isaksen Naalakkersuisunut ammasumik taama allagaqaateqarpoq.
Aappariit meerallit avikkunik aappaata meeqqanik paaqqutarinninngittup meeqqanut akilersuutinik akiliisartussaavoq. Kommuni matumani pisussaatitaavoq akilersuutinut siumoortumik akiliisussaq sinnerlugu aningaasalersuisussaatitaalluni, angajoqqaajusup meeqqamik meeqqanilluunniit paaqqutarinnittup aningaasanik pissarsisarnissaa qulakkeerneqarniassammat.
AAMMA ATUARUK Inatsisartut iliuuseqartariaqarput
Angajoqqaallu aappaata aningaasalersuutit taakku kommunimut akilertassavai. Pinerilli tamaasa taama pisoqarneq ajorpoq, Kommune Kujallermullu akiitsut katillugit maanna 56,3 millionit koruuniupput, Qeqqatalu Kommunianut akiitsut 59 millionit koruuniullutik.
Aningaasallu taakku kommuninit atorluarneqarsinnaagaluartut Kiista P. Isaksen isumaqarpoq:
- Aningaasarpassuimmi kommunit innuttaminnut sullissinerminnut pitsanngoriaatinut atugassaralui kommuninut pinngitsaaliissumik akiitsunnguutsinneqartarput, Kommune Kujalliup borgmesteria Naalakkersuisunut ammasumik allagaqaateqarnermini ilaatigut oqarpoq.
AAMMA ATUARUK Randi vil inddrive gæld med stramninger
Meeqqap meeqqalluunniit isumassorneqarnissaasa eqqugaannginnissaa qulakkeerneqartariaqarmat, Inatsisartunut Naalakkersuisunullu taamaammat kaammattuutigaa peqqussummik naapertuunnerusumik kommuninullu aningaasartuutaanngitsumik taarsiisoqarnissaa.
Meeqqanut akilersuutinut akiitsut kommuninut marluunnut pineqartunut tamarmik immikkut ukiumut 3 millionit koruuninik amerlisarput, Nunatsinnilu innuttaasut meeqqanut akilersuutinik akiliisimanngitsut 2016-imi 344 milliuunit koruuninik akiitsoqarput.
