Politikki

Meeqqanut akiitsullit sukaterinikkut akiliisinneqartartussanngortut

Nuna tamakkerlugu meeqqanut akilersuutit sooq taama amerliartortiginersut naalakkersuisunit ilisimaqanngilaq. Taamaattoq meeqqanut akilersuutinut akiligassallit akiliisittalernissaannut sukaterisoqartussanngortoq, Aningaasaqarnermut Naalakkersuisoq oqarpoq.

Allattoq Bikki P. Kleist

juunip 28-at 2016 05:36

Angajoqqaat qitornallit soorlu avissimappata aappaasoq meeqqanut akilersuisussanngortinneqarsinnaasarpoq. Akiitsullu suli amerliartortuarsinnarput:

-Pissusissamasoorsinnaanngilaq akiligassaqarneq taamannak, Randi Vestergaard Elvaldsen oqarpoq.

Akiitsullu ukiormanna katillugit 344 milliuunit koruuninngorsimasut sooq amerliartornersut naalakkersuisunit ilisimaneqanngilaq:

-Oqaatigisinnaanngilaq sooq amerliartortigisimanersut kisianni akilerseriaaseq pisortaninngaanniit allanngorlugu nutartigassanngorsimassaaq.

Aamma atuaruk Angajoqqaat 344 millionit koruuninik akiitsoqarput

Kommunini sisamaasuni ukiormanna meeqqanut akilersuisut katillugit 5.121-t nalunaarsorneqarsimapput.

Akileraartarnermut aqutsisoqarfik, Kommunit Ilanngaassivillu aqqutigalugit akiitsullit akiliisinneqarnissaanut suliaqartuussaapput.

Sukaterinissarlu allaqqunneqarsinnaanngitsoq, Aningaasaqarnermut Naalakkersuisup Randi Vestergaard Evaldsenip oqaatigaa:

-Sukatereriaatsit assigiinngitsut pilersaarusiuleruttorpavut, Taavalu Ilanngaassivik annertoorujussuarmik isumaqalertussaalluni. Neiuppugullu tamanna akuersissutigineqassasoq, januaarillu aallaqqaataani 2018-imi atuutilersinneqarsinnaassalluni. Sukaterinissalli assigiinngitsut massakkuminngaannit suliarineqalissapput, aningaasaqarnermut naalakkersuisoq oqarpoq.

Meeqqamut ataatsimut qaammammut ikinnerpaamik 1000 koruunit akiliutigineqartarput.