Kujallermi kommunip suliffeqarfiutaani pujortaqqusaajunnaassasut

Arnat marluk Kommunip Kujalliup allaffeqarfiani sulisuusut KNR-ip oqaloqatigai. Aappaa pujortarneq-ajorpoq, aappaalu pujortartartuulluni. Pujortaqqusiunnaarnissarli tamarmik isumaqatigaat.

- Uanga isumaqarpunga inuk nammineq naalagaasoq. Kisiat taama aalajangissappata aamma ajoriffissaqartinngilara,  Tupaarnaq Hansen Petersen taama oqarpoq.

- Ajorinngilara. Imminut aamma killilersinnaanissara misilittariaqassavara, pujortartartoq Sofie Berthelsen taama oqarpoq.

Naja Lund Inuit Ataqatigiinneersoq Kommune Kujallermi sulisut sulinerup nalaani pujortaqqusaajunnaarnissaannik siunnersuuteqartuuvoq. Akuersissutigineqarneralu siunnersuuteqartup nuannaarutigaa.

- Soorunami tulluusimaarutigeqaara ullumikkut aalajangiunneqarmat naqissuserneqarlunilu Kommune Kujalleq kommunini siullersaalluni nunatsinni suliffeqarferujussuartut 1000-it missaannik sulisulittut pujortaqqusiunnaarnissamik aalajangiussaqarmat.

AAMMA ATUARUK Peqqinnissaqarfimmi pujortartartukillissasoq

Siunnersuut upernaaq saqqummiunneqaqqaarmat meeqqerivinni sulisunut meeqqallu atuareeraangamik ornittagaannut sulisunut taamaallaat tunngatinneqaraluarpoq.

- Kommunalbestyrelsimi siullermeerlugu oqaluuserineqarnerani ingerlaannaq aalajangiunneqarami kommunimi sulisut immikkoortillugit isiginagit, tamakkiisumik tamaasa isigalugit siunnersuut imaqassasoq, Naja Lund taama oqarpoq.

Borgmester Kista P. Isaksenip pujortartaraluarluni siunnersuut akuerineqarmat nuannaarutigaa.

- Soorunami maligassiuinissamik aammalu peqqinnarnerusumik inuuneqarnissatsinnik taama aalajangiineq, tamattaalluta ataatsimut isumaqatigiilluta aalajangernerput nuannaarutigaara, borgmesteri oqarpoq.

Kommune Kujallermi sulisut pujortartartut pujortarunnaarnissamut pikkorissarnissaannik januaarip aallaqqaataata tungaanut neqeroorfigineqarnissaat tullinnguuppoq.

- Pujortarunnaarnissamut pikkorissarnerit ingerlanneqarsinnaanerat. Taamaammat naatsorsuutigaara sulisut nammineerlutik oqariartuutigisaasa ilagimmassuk aamma taanna angumerisinnaassallutigu. Taamaammat pilersaarutit tullii tassaassapput pikkorissaanerit, aammalu taama neqerooruteqarsinnaanissaq.

Kommune Kujalliup suliffeqarfiini sulisut katillugit 1000-it sinneqarput. Pujortarneq pillugu malittarisassat nutaat januaarip aallaqqaataani 2018-imi atuutilissapput.

AAMMA ATUARUK Lad ikke sundhedsvæsenets rygeforbud brede sig