Peqqinnissaqarfimmi pujortartartukillissasoq
Peqqinnissaqarfimmi sulisunut tamanut pujortartarneq pillugu politikki nutaaq juulip aallaqqaataani atuutilissaaq.
Sulisut, atorfillit sulillutillu peqqinnissaqarfiup illuutaaniittut allat tamarmik sulinerup nalaani pujortaqqusaajunnaassapput. Tamanna sulliviup silataani iluanilu atuutissaaq.
Pujortartarneq pillugu politikkimi tupa e-cigaretsillu pineqarput.
Peqqinnissaqarfik tapersersuiniarluni sulisunut paasititsiniaassaaq pujortartarunnaarnissamullu pikkorissartitsissalluni.
- Suliffeqarfiup kajuminnartuunissaa sulisullu tupamik pujormiutitaanatik sulisinnaanissaat kissaataavoq, peqqinnissaqarfik tupatorneq pillugu politikkimini allappoq.
Sulisut unioqqutitsigunik allakkatigut mianersoqqussummik tunineqarsinnaapput, allaallu soraarsitaanermik kinguneqarsinnaalluni.
Isumaqanngilarli peqqinnissaqarfik pujortarunnaaffiuvissasoq, tassami nakorsiat, uninngasut ilaqutaallu peqqinnissaqarfiup pujortartarfiini suli pujortarsinnaassapput.
