Jess G: Sukatereqqittoqartariaqannngilaq
Peqqinnissaqarfimmi sulisut sulinermi nalaani pujortatarunnaavinnissaat ippassaq oqaluttuaraarput. Peqqissaasut pisortaat naapertorlugu Peqqinnissaqarfimmi suligaanni pujortartarnissaq tulluartuunngilaq.
- Pujortarnerup kingunerisaanik nappaatit assigiinngitsut aamma nalunngilluaratsigit suusut taava aamma sulisumut taakku assigiinngitsullu siunnersuutit tusareerlugit suleqatigiissitani eqqartoreerlugit tamanna aalajangersimavarput, Ella Skifte taama oqarpoq.
Suliniut taperserpaa
Maleruagassiap nutaap Peqqinnissaqarfimmi sulisunut atuutilernera SIK-p siulittaasuanit pissusissamisoorsorineqarpoq.
- Eqqarsaatigigaanni maannakkut sorlu cigaritti peqqutigalugu ilaatigut inuit arlallit napparsimavimmut unittariaqartartut taamaattumillu aamma isumaqarpunga pissusissamisoortoq peqqinnissaqarfimmi taamatut aalajangertoqassappat, Jess G. Berthelsen taama oqarpoq.
AAMMA ATUARUK Peqqinnissaqarfimmi pujortartartukillissasoq
SIK-lli siulittaasuata peqqinnissaqarfimmi sukaterineq isumaqatigigaluarlugu, suliffeqarfiit peqqinnissaqarfimmut attuumassuteqanngitsut pujortartarneq pillugu maleruagassank sukateriffigineqartariaqarsorinngilai.
- Sukanganerungaartumik maani inatsiseqareerpugut, ilaatigut danmarkimi soorlu assersuutigalugu hotelini suli pujortarsinnaatitaapput taamaattumik isumaqarpunga tassunga tunngatillugu annertunerusumik sukatereqqittoqartariaqanngitsoq.
Taassumali assersuutigaa suliffeqarfiup iluani inuit qulit sinnerlugit sulisuugaangata suliffiup iluani pujortartarnerup inerteqqutaanera.
Isumaqatiginngilaa
Neriuffiulli kattuaffiani siulittaasup isumaq akerlerilluinnarpaa.
- Sunniiniarnissaq imaluunnuut anguniagaqarnissaq suliffeqarfinnut aamma allanut tuniluunnissaanik neriuutigissavarput, Neriuffimmi siulittaasoq Sara Brandt taama oqarpoq.
Taamatut maleruagassiornerup kinguneranik inuit pujortartartut ikiliartorsinnaaneri ilimagaa.
Nunatsinnimi pujortartartut ikigisassaanngillat. Peqqinnissaqarfiup kisitsisaatai naapertorlugit 2014-mi nunatsinni inuit 57-it procentii pujortartarput, qallunaat nunaanni 21 procentiusut.
