Nunatsinni autismertut pillugit ataatsimeersuartoqalersoq
Nunatsinni Autismertut peqatigiiffiata pilersinneqaqqammersup Danmarkimi Autismertut peqatigiiffiisa kattuffiat suleqatigalugu ataatsimeersuartitsineranut inuit 100-t pallillugit peqataassanngatinneqarput.
- Immikkut ilisimasallit inuillu namminneerlutik misilittagaqarsimasut ataatsimeersuarnermi katersorneqassapput, siunertarineqartorlu tassaavoq ilisimasaqarneq aamma attaveqaqatigiittartussanik pilersitsiortornikkut autismertunut ilaqutaasunullu inuunermi nalillit annertusarnissaat, Nunatsinni autismertut peqatigiiffianni siulersuisuni ilaasortaq, Karsten Høy oqarpoq.
Ataatsimeersuarnermut peqataaneq ullormut 700 koruuneqassaaq. Aaqqissuisullu naapertorlugit tamanna akisugisassaanngilaq.
- Ataatsimeersuarnermi ulluni pingasuni ingerlanneqartussami peqataanerup akia ullormut 700 koruunit missaanniissaaq, taamaammat ataatsimeersuarnermi peqataarusullutik nalunaartussat amerlanissaat neriuutigaarput, Karsten Høy taama oqarpoq.
NunaFondenimit aamma Tips og Lottomit aningaasaliissutinit tapiissuteqartoqarneratigut autismertunut angajoqqaajusut ilaqutaasullu ataatsimeersuarnermi akeqanngitsumik peqataasinnaanissaat aamma periarfissinneqarpoq.