KNR-ip pisortaa: Inatsisit allatut uagut paasivagut
Naak Naalakkersuisut inatsisaat malillugu KNR-i nittartakkatigut ussassaareqqusaanngikkaluartoq, taamaattoq KNR nittartakkamini ussassaarivoq, nittartagaq aallakaatitsisarnerup ilaattut taaneqarsinnaasutut isumaqaramik, taamaalillunilu ussassaarutinik ikkussiffigineqarsinnaalluni.
- TV-kkut Radiokkullu aallakaatitavut nittartakkatsigut isiginnaarneqarnissaat tusarnaarneqarnissaallu sullitatsinnit piumasarineqaleraluttuinnarnera naapertorlugu naliliivugut nittartagarput kiffartuussisussaanitsinnut ilaasoq.
Aamma atuaruk Pilerisaarutit knr.gl-imi peerneqarput
Aviisimi AG-mi pingasunngornermi saqqummersumi, KNR inatsisinik unioqqutitsillutik aningaasannanniarsimasutut isornartorsiorneqareersorlu, KNR-ip pisortaa, Søren Lennert Mortensen taama oqarpoq.
Inatsisit isumaat KNR-imit Oqartussanillu qulakkeerneqarsinnaanngilaq
Oqartussat inatsisaanni allassimasut qanoq paasisariaqarnersut, KNR-ip Namminersorlutik Oqartussallu qulakkeerlugu oqaatigisinnaanngimmassuk ussassaarutinik KNR nittartakkamut ikkussinissaminnik aalajangiussisimasut, KNR-ip tunngavilersuutigaa.
KNR-ip taama isumaqarnera Ilinniartitaanermut, Kulturimut, Ilisimatusarnermut Ilageeqarnermullu Naalakkersuisoqarfimmit isumaqatigineqanngilaq. Tamanna pillugu Naalakkersuisoqarfimmi pisortaq, Mikael Kristensen KNR-imut ima oqarpoq:
- KNR-ip imaluunniit Søren Lennert Mortensenip inatsisit qanoq paasineraat uagut akuleruffigissanngilagut. Tassami inatsisit allassimasutut uagut paasivagut.
Aamma atuaruk Tusarnaartartut inuusuttuunerusut KNR-ip sullinniarpai
Mikael Kristensenillu naqissuserpaa KNR-i taamaallaat TV-kkut Radio-kkulu ussassaarisinnaammat.
Tamanna pillugu KNR-ip pisortaa ima oqarpoq:
- Inatsisit malillugit KNR-i Nunatta karsianit aningaasalersorneqartussaavoq ilaatigut ussassaarutitigut aamma suliffeqarfiit ataasiakkaat aallakaatitassiatsinnut aningaasaliinerisigut. Tamakku tamaasa eqqarsaatigalugit inatsisit qanoq paasisariaqarneri ingasaatilaarsimavarput, Søren Lennert Mortensen oqarpoq.
Tusagassiuutit pillugit oqallittoqartariaqalerpoq
Søren Lennert Mortensenip oqaatigaa Nunatsinni tusagassiuutit pillugit inuiaqatigiit, Naalakkersuisut KNR-ilu atatsimoorussaminnik oqallittariaqalersut, oqallittoqassasorlu neriuutigalugu.
- Siunissami tusagassiuutit qanoq ingerlanneqarnissaat pillugu oqallinnermut uanga salliunissara qunussutiginngilara. Tassami tusagassiuutit qanoq aningaasarsiornissaat aammalu sunik aallakaatitsisarnissat pillugit nalorninerit qaangerneqarnissaat soqutigineruvara, KNR-ip pisortaa, Søren Lennert Mortensen oqarpoq.
Aamma atuaruk KNR-p aallakaatittagai radioqarfimmik pisinermi pitsanngortinneqassapput
Naqissuserlugulu KNR-ip nittartakkatigut ussassaarinermigut TV-kkut, Radiokkut nittartagarlu aqqutigalugu aallakaatitsinerit pitsanngorsarneqarnissaat anguniarsimagaluaraa.
knr.gl-imi ussassaarutit maanna peerneqarsimaleerput.
