KNR Pilerisaarutit knr.gl-imi peerneqarput
”Qullersaqarfiup kissaateqarnera soorngunami malittussaavarput, naak inatsisip nassuiarneqarneranut atatillugu Qullersaqarfik isumaqatiginngikkaluarlutigu,” taama oqarpoq KNR-ip pisortaa Søren Lennert Mortensen.
Radiukkut tv-kullu aallakaatitsisarneq pillugu Inatsisartut Inatsisaat nr. 7, 8. Juni 2014-imeersoq atulersinneqarsimasumi sumi sukkullu pilerisaarisinnaanermut atatillugu KNR-imut killissarititaasut allanneqarsimapput.
Ilinniartitaanermut, Kultureqarnermut, Ilisimatusarnermut Ilageeqarnermullu Qullersaqarfiup naliliinerat naapertorlugu knr.gl -imi saqqummersinneqartartut ”aallakaatitsinertut” isigineqarsinnaanngillat.
Inatsisit taakkorpiaat pillugit KNR-ip ingerlaavartumik Ilinniartitaanermut, Kultureqarnermut, Ilisimatusarnermut Ilageeqarnermullu Qullersaqarfik attavigisarsimavaa.
”Radiokkut TV-kkullu aallakaatinneqarsimasut ilarpassui nittartagarput aqqutigalugu isiginnaarneqarsinnaapput tusarnaarneqarsinnaallutillu. Tamannalu uagut isumarput malillugu aallakaatitsinertut isigigaarput.”Søren Lennert Mortensen oqarpoq imatullu ingerlaqqippoq:
”Soorngunami sullitatsinnut tamanna ajuusaarnarpoq, kisiannili peqquneqarnerput malittariaqarparput”.
Matuma erseqqissaatigineqarnissaa pingaartutut isigineqarpoq, tassa KNR-ip radiokkut tv-kullu pilerisaarisarfiisa allannguuteqannginnerat.
