AWG2016 Aallakaatitsinerup nipilunnera KNR-ip ajuusaarutigaa
KNR-TV Arctic Winter Gamesip ammaanersiornissaanut sivisuumik piareersaateqarpoq taamaammallu qilanaartuutigineqartorujussuulluni.
Qilanaarutilli tamarmik iluatsinngillat.
Takutitsineq oqaaseqartartoqarluni KNR1-ikkut aallakaatinneqarpoq. Isiginnaartartunullu oqaaseqartartoqanngitsumik isiginnaarusuttunut KNR2-miit isiginnaarnissaq periarfissaavoq.
Aamma atuaruk AWG2016-ip ammaanersiorneqarnera assilisat 15-it takukkit
Nittartakkanili inuit attaveqatigiiffigisartagaanni ullumikkut isornartorsiuineq imaaginnavippoq, taamaattoqarneralu pakatsinartoq KNR-ip aqutsisuisa nassuerutigaat.
- Aallaqqaammut oqaatigisinnaavara una ippassaq nipilussimanera kanalimi ataatsimi uani nipilussimanera soorunami nuanninngitsoq, KNR-ip aqutsisui sinnerlugit radiomi pisortaq Masaana Egede oqarpoq.
Suli misissuipput
Toqqaannartumik nittartakkakkut malinnaanermi radiomiillu nipaa ajoquteqanngilaq, AWG-illu pisortaata Maliina Abelsenip tikilluaqqusinera tusaaneqarsinnaalluarpoq. Ajoqutaasorli KNR2-miissimavoq, Masaana Egedellu atortut pisoqalisut peqqutaanerarpai:
- Atortugut qangarnisaapput taanna peqqutaasimanersoq massakkut akissutigisinnaanngilara kisianni aamma aappaatogit oqaatigerusuppara suli misissorparput sunarpiaq ajoqutaasimanersoq.
Neriorsuisinnaanngillat
AWG-lu aatsaat aallarteqqammerpoq, sulilu assuataarluni unnusiuaarnissamiit naggataarnersiornermiillu aallakaatitsisussaavugut. Kisiannili ajoqutaasup aaqqiivigineqareersimanissaa neriorsuutigineqarsinnaangilaq.
- Tassami oqaatigiinnarsinnaavara una sulissutigaarput nuannersumik aallakaatitserusulluta uani radiokkut tv-kkut aamma internetsikkut malinnaalluarluta aallakaatitsivugut.
