KNR-ip inuusuttunut radiokkut aallakaatitsivissaa akuerineqartoq
Taamaalillutit radio tv aqqutigalugu naalaarsinnaalissavat martsip 16-ianniit nalunaaqutaq 12.00. Ilutigitillugu radio internetikkut app-ilu aqqutigalugu naalaarneqarsinnaassaaq; sulili FM aqqutigalugu tusarnaarneqarsinnaassanngilaq.
- KNR Voicep tamatigoornerusumik tusaaneqarsinnaalernissaa soorunami nuannaarutigaarput, tassami inuusuttut kanalimik taassuminnga naalaarsinnaalersut amerlanerulernissaat aqqutissiuunneqarmat, KNR-ip pisortaa Søren Lennert Mortensen oqarpoq.
KNR-ip Nuummi naalaarneqarsinnaasoq Voice of Greenland pisiarisaa, maanna taanna allamik ateqalerpoq.
- 16. marts aallarnerfigalugu inuusuttut radioat taaguuteqalissaaq KNR Voice, taamaalilluni KNR-ip aallakaatittagaanut ilaalernera naqissuserneqarluni.
Pissanganartunik ataasinngorpat tullianiit naalaagassaqartalissaagut, kanalimi tassani aallakaatitassat katiterneqarneri aamma taamanikkussamut tamanut tusarliutissavagut, kikkulluunniit aamma tikilluaqqusaapput aaqqissuisoqarfik attavigissallugu kanalimi tassani sammineqarsinnaasunik siunnersuuteqarlutik, radiop pisortaa Masaana Egede nalunaarpoq.