KNR-imi juullimi ammartagarpassuit
Nunatta Isiginnaartitsisarfiani isiginnaartitsisartunngorniat sisamat isiginnaartitsisartullu marluk ilaqutariinnut juullimi ammartagaq "Serrat" suliarisimavaat, tassanilu qanga pisimasut ullumikkut pisut akulerullugit tupinnartuliatut oqaluttuarineqassallutik.
Naalaartartut inersimasuusut qilanaaralugu tusarnaarsinnaavaat juullimi ammartagaq nutaaq Stephen Heilmannimit suliarineqartoq, tassani oqaluttuarisaanitsinni kingumut qiviarnerulluni, kristumiussutsip Nunatsinni inoqarfinnut tamanut qanoq siaruariartorsimanera sammineqarluni. Immikkoortuni 24-usuni oqaluttuarineqassapput kristumiussutsip aamma kujataani avannaanilu niuernerup akornanni qanoq ataqatigiittoqarneranik oqaluttuat, Thulep eqqaani 1909-mi siullerpaamik juullisiortoqarneranik oqaluttuaq pillugu, Rasmus Berthelsenip taalliaa ”Guuterput” pillugu oqaluttuaq, aamma sooq Hans Egedep tikinneranit ukiut pingasut missiliorlugit aatsaat qaangiuttullu kalaaleq siulleq aatsaat kuisinnersoq.
Danmarks Radiop P1-iani tusagassiortut Emil Rothstein aamma Mikkel Rønnau atuakkiortoq Niviaq Korneliussen peqatigalugu nuummiuviuneq qanoq paasisariaqarpiarnersoq sammissavaat.
Taakku saniatigut KNR-imi nipilersukkanik nuannarineqarnerpaanik aallakaatitassiortartoq Hans Peter Bay juullimi erinarsuutinik 24-nik uagut tamatta nalunngilluakkatsinnik, taamaattorli allatut saqqummiullugit, sammisassavai.
Meeqqanut TV-kkut juullimi ammartagaq erinarsornermik imaqartussaq qilanaarisinnaavaat, tassani ammartakkat 24-t ammarneqassallutik, tamanilu juullimi erinarsuut nutaaq tusarnaarneqartassalluni. Erinarsortartup tusaamasap Randi Brobergip juullimi ammartagaq suliaraa, ullullu tamaasa erinarsornermik piginnaaneqarluartumik suli tusarsimanngisatsinnik pulaartoqartassalluni.
Nissit Titsi, Nivi, Kaaka, Aka, Nissi, Nuka aamma qimmeq Nguujuk nuannarineqarluarlutik isiginnaarneqarsinnaassapputtaaq, qanga juullimi ammartagaq quianartortalik Nissikkut pillugit aallakaatitassiami. Nissikkut Silamiunit suliarineqarpoq siullerpaamillu 1985-imi aallakaatinneqarluni.
