KNAPK-p WWF sakkortuumik isornartorsiorpaa
WWF-ip nunarsuarmi immikkoortortaqarfiisa assigiinngitsut aalisakkat Nunatsinni nungutaanissamut aarlerinartorsiortinneqanngilluinnartunik aalisakkat nungutaanissamut aarlerinartorsiortinneqartut allattorsimaffiinut ilanngussuinermikkut paatsiveerussaaripput.
WWF-ip Sverigemi immikkoortortaqarfiata siorna nalunaarutigaa atuisartut nipisat suaannik pisinaveersaartariaqartut, tamannali KNAPK-p sulissuteqarneratigut naqqinneqarpoq, KNAPK-p siulittaasua Henrik Sandgreen WWF-ip Danmarkimi immikkoortortaqarfianut tamanut ammasumik taamma allagaqarpoq.
WWF-ip Schweitzimi immikkoortortaqarfiata kukkulluni Kalaallit Nunaanni qalerallit aalisakkat nungutaanissamut aarlerinartorsiortinneqartut allattorsimaffiannut ilanngussimavaa. Kukkunerlu taanna WWF-ip Danmarkimi immikkoortortaqarfianit aamma naqqinneqartariaqarsimavoq, tamannarpiaavorlu KNAPK-p naammagiunnaagaa.
- Imaappoq WWF Danmark aatsaat pisoqarmat qisuariarpoq imaagani siumungaaq suleqatiminik eqqortunik avammut tusarliisoqartinnagu oqaluttuussigani. Innermik ikumalereersumik qatserinertut taasaqariaqarpoq, WWF-qarfiimmi arlaat nunatsinnut nersualaarinninngitsumik siammarterilereeraangata WWF Danmark annaassiniartutullusooq ililluni qamiteriniartarpoq, Sandgreen WWF Danmarkimut tamanut ammasumik allakkiamini taama allappoq.
Aamma atuaruk Aalisakkat nungutaasinnaasut allattorsimaffiannut nipisaat ilaalerput
Aamma atuaruk Pinngortitaleriffik: Nipisaat qanoq amerlatigineri nakkutigisariaqarput
Iliuuseqarnerusoqarnissaanik ujartuisoq
Taamatut nalunaaruteqartoqassatillugu Nunarsuaq tamakkerlugu pinngortitaq pillugu suliniaqatigiiffiup ilisimasallit peqatigalugit ataqatigiissaarinissaanik KNAPK ujartuivoq, taamaaliornikkut Kalaallit Nunaanni aalisarnermut taamatullu nunap aningaasaqarneranut ajoqusiinnginnissaa anguniarlugu.
Barentsip Imartaani nunat arfineq-marluk saarullinniarneri MSC-mik nalunaaqutserneqarsimapput, taamaammat KNAPK-p naatsorsuutigaa kalaallit imartami tassani saarullinniarnerisa nalunaqutserneqarnissaat qanittuaraassasoq. WWF-illi Tysklandimi immikkoortortaqarfia, KNAPK naapertorlugu, tamatumunnga akerliliisimavoq.
KNAPK-p tamanut ammasumik allagaqaatimini naqissuserpaa WWF-ip aalisarnerup piujuaannartitsinissamik tunngaveqarluni ingerlanneqarneranut pingasoqiusamik immikkoortitsisimanera pitsaasoq, suliarli toqqammaveqarluartumik siunertaqarluartumillu ingerlanneqartariaqartoq, Henrik Sandgreenip naqissuserpaa.
Aamma atuaruk KNAPK biologinut: Aalisartunukarlusi misissuiniaritsi
Peqatigisigut
KNAPK-p WWF-imi aalajangiisartut assersuutigalugu Schweitzimi allaffimmi issiaannaratik Kalaallit Nunaannukaqquaat aalisarnerlu piujuaannartitsinissamik tunngaveqarluni ingerlanneqarnersoq imaluunniit taamaattoqanngitsoq naliliiffigiartorlugu. KNAPK - WWF-ip nunarsuaq tamakkerlugu sulisorisaanut 5000-it missaanniittunut naleqqiullugu - mikisuunnguuvoq - WWF-imiillu nalunaarutigineqartartut assigiinngitsut naqqissortuarnerinut nukippassuarnik atuisariaqarnini qatsuppaa.
- WWF, suliniaqatigiiffittut nukittuutut ilumoorluarniartutullu avatissinniit isi-gineqarusuttartusi, soornguna ataavalersumik inuiaqatigiinnguit aalisarnerinnarmik piniarnermillu annerusumik toqqammavillit saassunniarsariinnarpisigit?
Gitte Seeberg WWF-illu Præsidiaa – sunarpiaq anguniarpisiuk, Henrik Sandgreen KNAPK-ilu taama naggasiipput.
Kalaallit Nunaanni Aalisartut Piniartullu KattuffiataGreenpeacep puisinniarnermut akerliulluni paasititsiniaaneratulli WWF-ip ajoqusiisinnaanera aarleqqutigaa, WWF-ilu uumasunik illersuiniat savat meqquinik poorsimasunut assersuunnarsinerunnginnersoq apeqqutigalugu.
Aamma atuaruk Aalisakkat amerlanerusut MSC-mik nalunaaqutsigaanissaat kalaallit kissaatigaat
