Aalisakkat amerlanerusut MSC-mik nalunaaqutsigaanissaat kalaallit kissaatigaat
Nunarput tamakkerlugu inuit 765-it, 18-init 70-it sinnerlugit ukiullit, illoqarfinneersut nunaqarfinneersullu, ima aperineqarput:
MSC-mik nalunaaqutsersuissagaanni, piujuaannartitsinissamik tunngaveqarluni aalisarnissamut piumasaqaatit arlariit naammassineqartussaapput. Nunatsinni raajarniarneq 2013-imi MSC-mik nalunaaqutserneqarpoq nipisanniarnerlu maanna aamma taamatut suliniuteqarfigineqarluni. Aalisakkat allat MSC-mik nalunaaqutserneqarnissaat sulissutigineqartariaqarsoraajuk?
Akissuteqarnissamullu periarfissat tassaapput ”Aap- taamaattariaqarsoraara”, ”aap-immaqa”, ”naagga-taamaattariaqarsorinngilara”, ”naagga-naamerluinnaq” kiisalu ”naluara".
82 procentit taamatut isummernerat WWF-ip nuannaarutigaa
Apersorneqartut 48 procentii "taamaattariaqarsoraara"-mik akissuteqarput, 23 procentit "immaqa"-mik 13 procentillu "naluara"-mik. Tamannalu tunngavigalugu 82 procentit akuersaartutut nalilerneqarput.
- Kalaallit Nunaanni innuttaasut amerlanerussuteqartut MSC-mik tamatumalu pissarsiarinissaanut piujuaannartitsinissamik tunngaveqarluni aalisartoqarnissaanik tapersersuinerat paasillugu assut nuannaajallannarpoq, nunarsuaq tamakkerlugu pinngortitaq pillugu suliniaqatigiiffiup WWF-ip pisortaa, Gitte Seeberg, tusagassiorfinnut nalunaaruteqarluni taama allappoq.
Aamma atuaruk Naalakkersuisoq: Qalerallit MSC-mik siunissami immaqa meqqilersorneqarsinnaassapput
Qalerallit nalunaaqutsersorneqarnissaat
Raajat 2013-imi MSC-mik nalunaaqutsersorneqartalerput, nipisaallu maanna nalunaaqutserneqarnissaat aamma qanittuararsuulluni. Kiisalu Aalisarnermut naalakkersuisuusimasup Finn Karlsenip KNR-imut siorna nassuerutigaa qalerallit MSC-mik nalunaaqutserneqarnissaaat avaqqukkuminaattoq.
- Qaleralinniarneq annertuupilussuullunilu pingaaruteqarpoq Kalaallit Nunaatalu aningaasaqarneranut pingaaruteqartupilussuulluni. Najukkami aammalu nunanut allanut nioqquteqarnermi annertuumik pissarsiaqaatigineqartarpoq. Taamaammat aalisarnerup iluani susassaqartut naalakkersuinermillu suliallit pingaarnersiuisariaqalerput MSC-millu nalunaaqutsiisoqarnissaa anguniarlugu, Gitte Seeberg oqarpoq.
Aamma atuaruk Qaleralittassanik qaffaanerit IA-mit isorartorsiorneqartut
Isumasiuinerup aamma takutippaa, aalisakkanik allanik amerlanerusunik MSC-mik nalunaaqutsersuinissaq aalisartunit piniartunillu aamma tapersersorneqartoq. 55 procentit apeqqummut akuersaarlutik akissuteqarput 22 procentit "taamaassoraara"-mik akissuteqartut. Tamannalu tunngavigalugu 82 procentit akuersaartutut nalilerneqartut, HS Analyse taama allappoq.
Aamma atuaruk 2015-imut qaleralittassat
