KNAPK biologinut: Aalisartunukarlusi misissuiniaritsi

Tassami Europami nipitsat Nunatta imartaanut naleqqiullugit allarluinnaapput, KNAPK oqarpoq:

- Europami nipitsat suaat allarluinnaqqissaarput. Nipitsat allaapput, Kalaallit Nunaanni nipitsat immikkorluinnaqqissaaq pinngortuupput, tassa Issittup nipisai aammalu uagut nipisaqassuserput maani Kalaallit Nunaanni aatsaat taama pitsaatigaaq, KNAPK-p pisortaa Petrus Biilmann oqarpoq.

Nipitsat aalisakkat nungutaasinnaasut apriilip aallaqqaataanit atuutilersumik allattorsimaffianniilernissaat, Pinngortitaq pillugu Nunarsuaq tamakkerlugu suliniaqatigiiffiup, Verdensnaturfondenip, sapaatip-akunnerata siuliani nalunaarutigaa.

Nunatsinnili nipisanniarneq Europami nipisanniarnermut naleqqiullugu allaanerungaatsiartoq, KNAPK-p oqaatigaa, tassami umiatsiaararsorluni, qassutinillu amerlanerpaamik 20-nik ningitsilluni Nunatsinni nipisanniartoqartarmat, Petrus Biilmann oqarpoq:

- Europami Islandikkunnlu angallatit anginerusut atorlugit pisaqapallarujussuarneq atorlugu piniartarput, taamaakkatta uagut assigiinngissutigaarput umiatsiaarannguanik eqqissilluta piniarpugut, Europamiulli angallatinik anginerusunik atorlutik piniarput piniapiluttutik, Petrus Biilmann oqarpoq.

Nipisannillu pisassiisoqartalissapat, aalisartut oqaloqatigeqqaarneqartariaqartut, taassuma aamma oqaatigaa:

- Biologit piumaffigineqartariaqarput issiavimminninngaanniit nikuillutik silamut anillutik misissuisariaqartut, oqaannaratik, eqqoriaasaqattaaginnaratik. Tulaanneqarsimasut tunngavigalugit taamaallaat nalunaarsugaateqarpugut, taamaammat pisariaqalerpoq biologit misissuilluarnerunissaat. Taamatut killilersuisoqassappat tunngavissaqartariaqarput, Petrus Biilmann oqarpoq.

Kalaallit Nunaat Islandilu nipitsat suaannik tunisassiortut nunarsuarmi annersaraat, piujuaannartitsinissarlu eqqarsaatigalugu nipisanniartoqartarnera aamma pingaartinneqarluni, Petrus Biilmann oqarpoq:

- Kalaallit Nunaat siuttuuvoq maannakkut MSC-mik meqqilersuinermut pilersitsiniarnermut. Kalaallit Nunaat suannik nioqqutissiortut maannakkkut anginersaat ilagivaat, taamaammat tigummiinnarniarparput, aammalu nammineq taamatut nalunaaqutsersuineq piginiarparput, tassa piujuaannartitsineq tunngavigalugu aalisarneqarnerat maani ingerlanneqarmat. Umiatsiaararsortuinnaavugut aalajangersimasumik qassusersorluta pivugut angallatit angisuut atornagit. Taamaammt uagut taamtut aqutsiniarnerput isumaqarpugut pitsarujorujussuusoq, KNAPK-p pisortaa Petrus Biilmann oqarpoq.

Nipitsat aalisakkat nungutaasinnaasut allattorsimaffianniilernissaat Verdensnaturfondenip sapaatip-akunnerata siuliani nalunaarutigereeraalu, nunatsinni nipisanniarnerup eqqorneqarsinnaanera KNAPK-p aarleqqutigilerpaa.