- Taava Naalakkersuisutut tunuartussaassaanga pinngitsoornanga, taava sullarlussimavunga. 

Aalisarnermut inatsisiliami akuersissutigineqannginnera qanoq kinguneqassanersoq pillugu KNR-imit aperineqarami, Aalisarnermut Piniarnermullu Naalakkersuisoq Kim Kielsen (S) taama erseqqitsigisumik akivoq. 

Parteeqataa Naalakkersuisoqarfimmilu taarsigaa Karl Tobiassen Aalisarnermut Piniarnermullu Naalakkersuisunngorami ukiup ataatsip iluani aalisarnermut inatsisiliornissamik neriorsuuteqartoq taamani aamma taama oqarpoq. Taannali aalisarnermut inatsisiliunngitsoorpoq. 

Inuussutissarsiutit pingaarnersaannik ukioq ataaseq affangajallu akisussaaffeqareerluni Karl Tobiassen tunuarpoq. 

Inatsit nutaaq pisariaqarpoq

Kim Kielsenip oqaatigaa, aalisarnermut inatsisiliortoq inatsisissami pineqarnani aalisarnermik inuussutissarsiutillit pineqartut. 

- Uanga uani inuttut pineqanngilanga, inuiaqatigiinnut tunngatillugu inatsit aalisarnerup silarsuaani atuisut tassa aalisartut 2.200-t missaanniittut taakkununnga atuuppoq. 

Ukiulli 20-t sinnerlugit inatsisissaq suliarineqarpoq. Taamaattorli isorinnittut tuaviuussisoqarsimanerarlugu naammagittaalliorput, sivisuumik inatsisiliorniarsarisoqareersoq naggataasersorneq tuaviuussaaneralugu.

Naleqqap oqaaseqartartua Jens Napãtôk taakkununnga akuuvoq. Inatsisissap inatsisartuni siullermeermeqarnerani ernumassutini oqaatigaa: 

- Aalisartut suliffeqarfiillu namminersortut eqqornerlunneqassapput, inatsisiliornikkut uumatillugit ilineqalerput, Jens Napãtôk oqarpoq. 

Taamaakkaluartoq massakkoqqissaaq nutaamik inatsisiliortoqarnissaa Kim Kielsenip attappaa: 

- 96-miilli atuuppoq 13-eriarluni ilaartorneqarnikuuvoq aaqqissorneqarnikuulluni. Tassa piffissaanikuuvoq taamaakkami aamma ataatsimiititaliarsuarmik pilersitsinikuuvugut marloriarluta 17-imi 19-imilu. Taakkulu najoqqutaralugit suliat ingerlanneqarnikuupput.  

Arlaanik eqquivugut

Aalisarnerli eqqartorneqartillugu misigissutsit eqqorneqartarnerat Kim Kielsenip nassuerutigaa. Aalisarnerli kisimi pineqarani inuussutissarsiuummi kulturi kinaassuserlu aamma pineqarput. 

- Uani tupinnanngilaq eqquigatta qisuariartoqartoq, Kim Kielsen oqarpoq. 

Nunatsinnili inuussutissarsiutit pingaarnersaat aamma pineqarpoq - aamma aningaasatigut. Kalaallillu Nunaata aningaasaqarnera siunissamut aamma qulakkeerneqassappat, inatsisip piffissami inuuffigisamut tulluartuunissaa pingaaruteqarpoq: 

- Nunatta kaaviaartitaasa 95 procentii aalisarnermersuupput, taamaammat inatsisissap nutarterneqarnerani nalimmassaasimavugut.