Aalisarneq pillugu inatsisissatut siunnersuut borgmesterinit, aalisartunit ilisimatuunillu isornartorsiungaatsiartoqarpoq.

Aalisarnermut piniarnermullu naalakkersuisup, Kim Kielsenip Siumumeersup isornartorsiuineq tallimanngornermi ullaap tungaani tusagassiortunik katersortitsinermi akerlilerpaa.

- Ilisimatuut qanorluunniit oqalutsigigaluarpata aamma uagut piniartutut aalisartutut ataasiakkaat nalunngilarput inuussutissarsiuterput akiginavianngilarput, taanna oqarpoq.

Aamma naak ilisimatuut arfinillit inatsisissaq umiatsiaararsortunut qanoq kinguneqarnissaa siunnersuummi allassimannginnera pillugu inatsisissatut siunnersuut Aalisarnermut Piniarnermullu Naalakkersuisoqarfimmut tusarniaassummut akissumminni isornartorsioraluaraat.

Inatsisissatut siunnersuummi sinerissap qanittuani nammineq pigisassanik pisassiisalernissaq (IOK siunnissaavoq, tamanna siunissami sinerissap qanittuani aalisartut affaat sinnerlugit ikiliisinnaavoq.

- Aningaasaatilissuit, aningaasanillu allanik aallerfissaqariaannaat kisimik aalisarnermik ingerlatsilernissaat inatsisissatut siunnersuummi erserpoq, Aalborg Universitetiani Pilersaarusiornermut Piujuaannartitsinermullu lektori, Rikke Becker Jacobsen, oqarpoq.

Maanna suliaqartoqassasoq

Aalisarnermut Piniarnermullu Naalakkersuisoqarfiup sapaatini akunnerni arfineq-pingasunik sivisussuseqartumik tusarniaanermi akissutit 40-t pissarsiarai. Kim Kielsenillu oqarnera naapertorlugu isornartorsiuineq oqaaseqarfiginissaanut suli piffissaqanngilaq.

- Nalilersussavagut. Misissuataassavagut. Aaqqitassaqassagutta erseqqissaassutissanik assigiinngitsunik peqassagutta taava taamaaliussuugut, Kim Kielsen oqarpoq, nangillunilu:

- Kisianni uanga oqarusuppunga. Naalakkersuisooqatigiit aalisarneq ukiut qulit qaangiuppata sequmittussatut - taamatut sulisoqarsinnaanngilaq naalakkersuinikkut.

Kim Kielsenip ilisimatuut tusarniaanermi akissuteqarnerminni inatsissisatut siunnersuut taamaatsiinnarlugu akuerineqaraluaruni umiatsiaararsorlutik aalisartut 900-nit 400-nut ikilisinnaanissaannik siulittuuteqarnerat innersuussutigaa.

Ajutoorujussuartitsisinnaasoq, Ilisimatusarfimmi inuiaqatigiilerinermi ilisimatooq, Birger Poppel oqarpoq:

- Ajunaarnersuartut sunniuteqassaaq. Tamat oqartussaaqataanerat innarlerneqarujussuassaaq. Pingaartumik inatsit taamaatsillugu inuiaqatigiit peqataatillugit oqallisigineqartissimanngikkaanni, taanna oqarpoq.

Paatsiveerussaanerit tulluanngitsut

Kim Kielsenilli nammineq pigisassanik pisassiisarnissaq akuerineqassappat ajunaarnersuartut pisoqarsinnaanissaa ernumatiginngilluinnarpaa. Taassuma oqarnera naapertorlugu ilisimatuut isornartorsiuinerat paatsiveerussaariniarneruvoq.

- Taamaattut paatsiveerussaanerit allatigullu tulluanngitsutut isigaakka. Taama ersaritsigisumik oqassuunga. Uani pingaartupilussuugami aalisartoq kinaluunniit aalisarnermut inatsisissami toqqissilluni – pisinnaatitaaffini pisussaaffinilu – aamma tassa takusinnaassagai. Uagut naalakkersuisooqatigiinni aalisartunik nungusaanianngilagut, taanna oqarpoq.

Ilisimatusarfimmi inuiaqatigiilerinermut ilisimatuup, Birger Poppelip oqarnera naapertorlugu aalisarneq pillugu inatsisissaq aalisartut ilaqutariinnullu ataasiakkaanuinnaq inuussutissaminnik annaasaqarnerannik kingunerluuteqaannarnavianngilaq. Inatsillu kalaallinut inuiaqatigiinnut tamanut kingunerluuteqassanerarlugu nassuiaavoq:

- Inuit taakku nunartik qimattariaqassagunikku sumut taava nuussappat? Inissaqarpat, meeqqerivissaqarpat suliffissaqarpallu? Inuiaqatigiinni naligiinnginneq ingalluni annertunerulissaaq, Birger Poppel oqarpoq.

Isornartorsiuinerli aamma taanna Kim Kielsenip tallimanngornermi tusagassiortunik katersortitsinermi aamma itigartitsissutigilluinnarpaa:

- ”Nerissavai tusagassiorfiit tunisassiorfiit. Nunap immikkoortuini nungorassasut. Aammalu inoqarfiit sumiiffinni ataasiakkaani matoorassasut.” Aamma taanna siunertaanngilaq, taanna oqarpoq.

Aalisarneq pillugu inatsit Inatsisartuni upernaakkut ataatsimiinnermi oqaluuserineqassaaq.