Kim Kielsen: Qaasuitsup Kommuniata avinneqarnissaa suli sulissutigaarput
Kommunimi innuttaasut taasitinneqarmata amerlanerussuteqartut kommunip avinnissaa kissaatigalugu taasissutigaat.
Taakkulu piumasaat piviusunngortinniarneqartoq, Kim Kielsen erseqqissaavoq.
- Naalakkersuisoqatigiit isumaqatigiissutaanniippoq. Qaasuitsup kommuniata avinniarneqarneranut tunngatillugu, ataqqineqassasoq. Taamaammat naalakkersuisoqatigiit isumaqatigiissutaat 2018-ip tungaanut ingerlavoq, Qaasuitsup Kommuniata innuttaasuisa 2014-imi taasitinneqarnerannut innersuussilluni Kim Kielsen oqarpoq.
Tassalu Qaasuitsup Kommuniata avinneqarnissaanut Naalakkersuisut suli periarfissarsiornerat erseqqissarlugu.
Aamma atuaruk Qaasuitsup Kommuniani Siumukkut kommunip avinneqarnissaa sulissutigiinnarniarpaat
Taamaattoq kommunip qaqugu avinniarneqarnissaanut siunnersuuteqarniarnerlutik Naalakkersuisut siulittaasuata suli oqaatigisinnaanngilaa.
- Taakkualu qulaajagassat assigiinngitsut suliarinissaat anguniarsarissavagut. Kisianni soorunami sapinngisamik tuaviorluta qukaajagassat qulaajassavagut, Kim Kielsen oqarpoq.
Aaqqissuussaanermut isumalioqatigiissitap isumaliutissiissutaani anguniagassatut, periusissatut aamma tunngaviusumik naatsorsuutigisatut siunnersuutigineqarsimasut aalajangiussimaneqassasut, Naalakkersuinikkut ataqatigiissaarisoqatigiit ataasinngormat tusagassiuutinut nalunaarutigaat.
Isumaliutissiissullu taanna Qaasuitsup Kommuniata avinneqarnissaanut suliamut aallaaviuvoq.
Aamma atuaruk Qaasuitsup Kommunia avinneqassanngilaq
Kisianni naalakkersuisoqatigiit isumaqatigiissutaat malillugu Upernavik, Uummannaq Qaanaarlu illoqarfiliullugit kommuniliortoqassagaluarpat, isumaliutissiissutip tunngavigititai eqquutsinneqaruminaassasut, Kim Kielsenip nassuerutigaa.
- Suliassat lommuninut apuussorneqassappata, taava kivissinnaassagunikkit innuttaasullu ajunnginnerpaamik kiffartuutissagunikkit taava kommunimi innuttaasut 8000-iusariaqarput. Taanna pillugu Qaasuitsup Kommunia avinneqassappat, tamakkua assigiinngitsut qulaajarneqartariaqarput. Qanoq angitigisoq avinneqassava, sukkut avinneqassava kommunilu qassinut avinneqassava, Naalakkersuisut siulittaasuat Kim Kielsen oqarpoq.
KANUKOKA aamma Qaasuitsup Kommunia Qaasuitsup Kommuniata avinneqarnissaa suli sulissutigalugu aamma nalunaarput.