Qaasuitsup Kommuniani Siumukkut kommunip avinneqarnissaa sulissutigiinnarniarpaat
NAQQIUT: Qaasuitsup Kommunia avinneqassanngitsoq qulequttap nassuiaataani allaqqagaluarpoq. Naqqitaq maanna allaqqavoq: Qaasuitsup Kommunia avinneqarallassanngitsoq.
- Kommunerujussuaq pitsaasumik siunertaqarluni pilersinneqarpoq. Kisianni ingerlanermini, massakkut ukiorpaalunngortuni innuttaasunik sullissinerit pitsaanngillat. Taamaammat avinneqassanngikkuni, tassaassaaq innuttaasunik suusupaginninneq annerpaaq, Kristian Broberg taama oqarpoq.
Taanna isumaqarpoq, kommunip avinnissaa pillugu kommunimi innuttaasut upernaakkut 2014-imi taasitinneqarnerata inernera ataqqineqartariaqartoq.
- Naalakkersuisut siulittaasuata akisussaaffini soorlumi paasisimanngikkaa. Qaasuitsup Kommuniani inuit taasitinneqarmata 80 procentit aveqqusisut paasisimanngikkaa. Kristian Broberg taama oqarpoq.
Inuit Ataqatigiit Qaasuitsup Kommunia avitsikkusunngilaat. Taamaattoq Inuit Ataqatigiit kommunimi gruppiata siulittaasuat, Bendt B. Kristiansen kommunip avinneqannginneqarallannginnissaanik aalajangernermut isornartorsiuivoq.
- Naak oqaraluarluta Qaasuitsup Kommunia avinneqanngikkuni pitsaanerusoq, avinneqarnissaanut suleqataavugut. Uanili mamaatsoornartorujussuaq tassaavoq, innuttaasut taama amerlatigisut oqariartuutaat, allaallu 2017-ip tikitsinnagu kommunip avinnissaanik oqariartuuteqaqattaareeraluarnerit tunulluinnarluni siuttutta taamatut muminnerat akuersaaruuminaattorujussuuvoq, Inuit Ataqatigiit Qaasuitsup Kommuniani gruppianni siulittaasoq, Bendt B. Kristiansen taama oqarpoq.
Naalakkersuisoqatigiinnissamut isumaqatigiissut taanna innersuussivoq.
Isumaqatigiissummi allaqqavoq, innuttaasut taasitinneqarneranni Qaasuitsup Kommuniata avinneqarnissaanik amerlanerussuteqartut piumasaqarnerat eqquutsinniarlugu sulissutigineqarniartoq.
